Qarabaginfo.az xəbər verir ki, bunu Apa-ya açıqlamasında “Qarabağa dönüş” təşkilatının rəhbəri, millət vəkili Tural Gəncəliyev bildirib. O qeyd edib ki, 44 günlük ikinci Qarabağ Müharibəsi başa çatandan sonra Azərbaycan humanizm prinsiplərinə necə əməl etməyi dünyaya əyani şəkildə nümayiş etdirib: “Müharibənin başa çatmasından az bir vaxt keçməsinə baxmayaraq Azərbaycan tərəfi Ermənistana 1600-dən çox işğalçının cəsədini və onların qalıqlarını aşkar edərək təhvil verdi. Bu proses bu gün də davam edir. Bəs birinci Qarabağ müharibəsi dövründə işğalçı Ermənistan nə etdi? Müvafiq qurumların apardığı araşdırmalara görə, birinci Qarabağ Müharibəsi zamanı 3888 nəfər soydaşımız erməni terrorçuları tərəfindən əsir və girov götürülüb. Soydaşlarımızın bəziləri ermənilərə yaralı vəziyyətdə əsir düşüb. Bu insanlara lazımı tibbi yardım edilmədiyindən onların əksəriyyəti həyatlarını itiriblər. Sağ qalanların isə ən ağır işgəncələr altında dağ-mədən və digər ağır işlərdə işlədildikləri ilə bağlı məlumatlar yayılırdı. İndi sual olunur. Ermənistan 30 il ərzində əsirlikdə olan soydaşlarımızı niyə azad etmədi? Yaxud da hansı əsir və girovun taleyi ilə bağlı Azərbaycan tərəfinə məlumat təqdim olundu? Humanizm prinsipləri həmin vaxt niyə Ermənistan rəsmilərinin və onlara havadarlıq edən ölkələrin, beynəlxalq təşkilatların rəhbərlərinin yadına düşmədi?”.

T. Gəncəliyev bildirib ki, Ermənistandan əsir və girov götürülmüş soydaşlarımızla bağlı izahat tələb etmək məqsədi ilə dəfələrlə rəhbərlik etdiyi qurum rəsmi məktublarla yanaşı videomüraciətlər formasında beynəlxalq təşkilatlara sorğular göndərib. Amma edilən müraciətlərə cavab verilməyib: “Biz beynəlxalq təşkilatların təmsilçiləri ilə keçirdiyimiz əksər görüşlərdə bu məsələni qaldırırıq. Təəssüflər olsun ki, hələ də əsirlikdə olan soydaşlarımızın taleyi ilə bağlı hər hansı dəqiq məlumata malik deyilik. Düşmən tapdağından azad olunmuş ərazilərimizdə böyük quruculuq işləri aparılır. Azərbaycan dövlətinin başlıca məqsədi keçmiş məcburi köçkünlərin ən qısa zamanda öz ata-baba yurduna qayıtmasını təmin etməkdir. İnsanların geri qayıtdıqdan sonra əsir və girov götürülmüş yaxınları ilə bağlı dərdləri yenidən təzələnəcək. Övlad həsrəti ilə bu insanların bir qismi həyatdan köçüblər. Sağ qalan valideynlər, qardaş-bacılar isə bu gün də xəbər gözləyirlər. Elə etməliyik ki, Ermənistan ən qısa zamanda əsir və girov götürülmüş azərbaycanlılarla bağlı məlumatları Azərbaycana təqdim etsin”.