Rusiyanın Yamalo-Nenets muxtar dairəsində meşə yanğınları davam edir, 130-dan çox yanan ərazi, tüstü şəhərləri bürüyüb, məhdud görüntü səbəbilə magistral yolların bağlanmaq ehtimalı var.

Qarabaginfo.az xəbər verir ki, yanğınlar vilayətin altı rayonunda 26000 hektardan çox ərazini əhatə edib.

Ən pis vəziyyət Krasnoselkupski rayonundadır. Purovski rayonu və Ural bölgəsində də böyük yanğınlar davam edir. Novı Urenqoyu bürüyən duman digər yaşayış məntəqələrinə yayılır.

Hazırda təxminən 700 yanğınsöndürən və üç Mi-8 helikopteri yanğınlarla mübarizə aparır. Xilasedicilərə kömək etmək üçün artıq İrkutsk, Tümen, Yekaterinburq və Arxangelskdən mütəxəssislər gəlib və Kareliya və Sverdlovsk vilayətindən hava meşə mühafizəsi heyəti tezliklə onlara qoşulacaq.

Yerli hakimiyyət orqanlarının məlumatına görə, isti və quraqlıq yanğınların daha sürətlə yayılmasına səbəb olur və bu hava şəraitinin yaxın günlərdə də davam edəcəyi gözlənilir.

Bölgədə fövqəladə vəziyyət elan edilib.