Son vaxtlar bir çox vətəndaşın qarşılaşdığı vəziyyət belədir: əməkhaqqı kartının müddəti bitib, amma maaş həmin hesaba köçürülüb. Belə halda maaşı almaq mümkündürmü?

Qarabaginfo.az xəbər verir ki, qüvvədə olan qanunvericiliyə və bank qaydalarına əsasən, etibarlılıq müddəti bitmiş kartdan istifadə etmək qadağandır. Kartın vaxtı bitdikdən sonra o, avtomatik olaraq bağlanır və bu kart vasitəsilə nə ATM-dən pul çıxarmaq, nə də alış-veriş etmək mümkündür.

Lakin bu, vətəndaşın əməkhaqqısına çıxışını məhdudlaşdırmır. Əgər yeni kart hələ hazır deyilsə, şəxs bankın istənilən filialına şəxsiyyət vəsiqəsi ilə müraciət edərək hesabında olan vəsaiti nəğd şəkildə ala bilər. Banklar bu xidməti göstərməyə qanunla borcludurlar.

Maliyyə ekspertləri bildirirlər ki, kartların yenilənməsi bəzən texniki və ya təşkilati səbəblərlə gecikə bilər, lakin bu, maaşın verilməsini ləngitmək üçün əsas ola bilməz. Müştəri hesabdakı məbləği birbaşa bankdan tələb edə bilər.

Adətən banklar kartın etibarlılıq müddəti bitməzdən bir ay əvvəl müştərilərə xəbərdarlıq göndərirlər. Buna görə də vətəndaşlara kartlarını vaxtında yeniləmək və gecikmə halları yaranarsa, dərhal banka müraciət etmək tövsiyə olunur.

Nəticə etibarilə, kartın vaxtı bitsə belə, əməkhaqqı hesabda qalır və vətəndaş onu bankdan şəxsən alaraq sərəncam verə bilər. Bankın bu imkanı yaratmaması isə qaydaların pozulması hesab olunur.