Milli Məclisin sədr müavini Adil Əliyev seçiciləri ilə görüşüb.

Qarabaginfo.az xəbər verir ki, bu barədə deputat sosial hesabından paylaşım edib.

Paylaşımda deyilir:

"Bu gün Milli Məclisə deputat seçildiyim 20 saylı Nərimanov ikinci seçki dairəsi ərazisində yaşayan seçicilərlə görüşdük.

Pandemiya qaydalarına uyğun keçirilən görüşdə seçicilərimizə Vətən müharibəsindən ötən 10 ayda işğaldan azad edilmiş ərazilərimizdə aparılan böyük abadlıq-quruculuq işlərindən danışaraq, Ali Baş Komandan İlham Əliyevin rəhbərliyi ilə möhtəşəm Zəfər qazanan Azərbaycanın 30 illik işğala son qoyduqdan dərhal sonra öz əzəli torpaqlarında bərpa və yenidənqurmaya başladığını bildirdik. Birinci vitse-prezident Mehriban xanım Əliyevanın fəaliyyətindən bəhs edərək Heydər Əliyev Fondu tərəfindən mədəniyyət paytaxtımız Şuşada təşkil edilən tədbirlər barədə geniş məlumat verdik.

Görüşdə seçicilərin müraciətlərinə həssaslıqla yanaşaraq, onların qaldırdıqları bir sıra sosial, məişət, humanitar xarakterli məsələlər yerindəcə həll edildi. Digər müraciətlərin həlli üçün aidiyyəti üzrə müxtəlif qurumlara məktublar ünvanladıq. Həmçinin, bəzi vətəndaşlara müraciətləri ilə bağlı qanunvericiliyin tələblərinə uyğun izahlar verdik. Eləcə də seçicilərimizə koronavirus pandemiyası ilə əlaqədar Nazirlər Kabineti yanında Operativ Qərargahın tələblərinə əməl etmək tövsiyə olundu.

Seçicilərlə keçirilən görüşdə Bakı şəhər Nərimanov Rayon İcra Hakimiyyəti başçısının müavini və digər vəzifəli şəxslər iştirak etdilər."