Qazaxıstanın respublikada nüvə klasterinin yaradılması üçün üç atom elektrik stansiyasına (AES) ehtiyacı var.

Qarabaginfo.az xəbər verir ki, bu barədə Qazaxıstanın energetika naziri Almassadam Satkaliyev bildirib.

Bununla bağlı nazirlik 2025-ci ilin ikinci rübünə qədər bu məsələ ilə bağlı hərtərəfli plan hazırlayacaq.

"Nüvə klasterinin yaradılması üçün ən azı üç AES lazımdır. Biz xüsusilə Energetika Nazirliyinin strateji planını hazırlayarkən bu prizmadan çıxış edəcəyik. Sahələr AES-in yerləşəcəyi ümumi plan əsasında müəyyən ediləcək", - o, brifinqdə deyib.

Energetika Nazirliyinin apardığı araşdırmaya görə, Balxaş gölünün yaxınlığındakı Almatı rayonu AES üçün ən uyğun yer kimi müəyyən edilib.

Qazaxıstan hakimiyyəti bir neçə potensial nüvə texnologiyası təchizatçısını, o cümlədən Çinin CNNC, Cənubi Koreyanın KHNP, “Rosatom” və Fransanın EDF şirkətlərini nəzərdən keçirir.

Hökumət layihənin həyata keçirilməsi üçün beynəlxalq konsorsiumun yaradılması imkanlarını da araşdırır.