Rusiya və Azərbaycan təkcə ikitərəfli münasibətlərin deyil, həm də ölkələrimizin qarşılıqlı fəaliyyət göstərdiyi regional vəzifələrin inkişafının vacibliyinə əsaslanaraq bütün sektorlarda fəal əməkdaşlıq edirlər.

Qarabaginfo.az xəbər verir ki, bunu Rusiya paytaxtında keçirilən MDB Xarici İşlər Nazirləri Şurasının iclası çərçivəsində azərbaycanlı jurnalistlərə açıqlamasında Rusiya Xarici İşlər Nazirliyinin rəsmi nümayəndəsi Mariya Zaxarova deyib.

“Biz kollektiv Qərb ölkələrinin, NATO blokunun bulanıq suda balıq tutmaq və üstəlik, bu suyu bulandırmaq üçün böyük istəyini görürük. Düşünürəm ki, regionun digər ölkələri kimi Bakı da bunu yaxşı bilir”, - rusiyalı diplomat vurğulayıb.

Zaxarova qeyd edib ki, Cənubi Qafqaz ölkələri elə etməlidir ki,“Qərbin xaosu idarə etmək istəyi ilə dünyanın müxtəlif yerlərində müşahidə olunan ümumi sabitliyin pozulması bizim ümumi regionumuza keçməsin”: “Bu region çox məşəqqətli, müxtəlif millətlərdən olan insanların qəlbində çoxlu münaqişələrdən, hətta qanlı, amansız müharibələrdən keçib. Ona görə də kim sülhlə gəlmək, kömək etmək istəsə, məncə, hamı tərəfindən xoş qarşılanacaq. Qoynunda daş yox, bıçağı belə olanlar isə regionumuzdan rədd olsunlar. Biz bu regionda sülhü qorumaq üçün birgə çox səy göstərmişik, biz hər şeyi etməliyik ki, növbəti hiyləgərlər və manipulyatorların idarəolunan xaos siyasətini ortaya qoymasına imkan verilməsin. Çünki son onillikdə bu xaos idarəolunmaz xarakter alıb”.