"Laçın - Xankəndi yolunda qeyri-hökumət təşkilatlarımızın və ictimai fəallarımızın haqlı etiraz aksiyaları fonunda Qarabağdakı separatçı rejim mülki əhaliyə qarşı təzyiq göstərir”.

Qarabaginfo.az xəbər verir ki, bunu APA-ya açıqlamasında Milli Məclisin deputatı Fatma Yıldırım deyib.

Fatma Yıldırım bildirib ki, aksiyaçılar Laçın yolunu bağlamayıb və Rusiya sülhməramlılarının məsuliyyət zonasında olan mülki ermənilər humanitar məqsədlər üçün yoldan rahat istifadə edə bilərlər: “Yolun açıq olması ilə bağlı kifayət qədər video görüntülər də var. Lakin Qarabağdakı Vardanyan-Arutunyan cütlüyünün rəhbərlik etdiyi quldur dəstəsi Xankəndi sakinlərini faktiki girov saxlamağa çalışır və onların yoldan istifadə etməsinə əngəl törədir. Məqsəd dünya ictimaiyyətinə Laçın yolunun bağlı olduğunu göstərmək və guya Azərbaycanın humanitar böhran yaratdığını nümayiş etdirməyə çalışmaqdır. Hətta iş o yerə çatıb ki, Xankəndi sakinlərinin sosial şəbəkə hesabları izlənilir və təftiş edilir. Onlara təzyiqlər edilir, hətta döyüb işgəncə verilməsi haqqında məlumatlar var”.

Deputat qeyd edib ki, Vardanyan və Arutunyan kimi cinayətkarlar Qarabağın mülki ermənilərinin Azərbaycana reinteqrasiyasına mane olmağa çalışır və bunun üçün hər cür təxribatlara əl atmaqdan çəkinmirlər: “Çünki bilirlər ki, sadə ermənilər arasında Azərbaycan qanunları əsasında yaşamağa hazır olanlar az deyil. Onlar Azərbaycanın sosial-iqtisadi inkişafını görürlər. Dövlətimizin mövqeyi bundan ibarətdir ki, Qarabağ erməniləri yalnız bizim qanunlarımız çərçivəsində yaşaya bilər və hansı erməni bunu qəbul etmək istəmirsə, yol açıqdır, çıxıb gedib başqa yerdə yaşasınlar. Ermənistan hakimiyyəti, Ruben Vardanyan və Arayik Arutunyan da sadə erməniləri öz çirkin maraqlarının girovuna çevirməyə çalışırlar”.

Fatma Yıldırımın söslərinə görə, bu gün Ermənistan hakimiyyəti yaranmış vəziyyətə məntiqsiz yanaşır: “Gah Rusiyadan yardım istəyir, gah da rəsmi Moskvanı tənqid edir. Oktyabrın sonunda liderlərin Soçi görüşündə Paşinyan bildirmişdi ki, Rusiya sülhməramlıları Qarabağda müddətsiz qalmalıdır. İndi isə Rusiya sülhməramlılarının bölgədən çıxmalı olduğunu hesab edir. Rəsmi İrəvan indi beynəlxalq təşkilatlardan ibarət missiyaların Qarabağa gəlməsinin zəruriliyi haqda əsassız iddialar ortaya qoyur. Bütün bunlar Paşinyanın siyasi səbatsızlığının göstərir. Dövlət idarəçiliyi anlayışı olmayan Paşinyan və onun komandası sadəcə regionda öz marağı olan müəyyən beynəlxalq dairələrin əlində oyuncağa çevrilib”.