Səudiyyə Ərəbistanı və Türkiyə ABŞ prezidenti Donald Trampı İranla bağlı diplomatik səylərə daha çox vaxt ayırmağa çağırıb. İsrailin baş naziri Benyamin Netanyahu isə ABŞ-da aralıq seçkilərdən dərhal sonra Tehrana qarşı birgə hərbi əməliyyat keçirilməsinə nail olmağa çalışır.
Bu barədə “Axios” nəşri ABŞ, İsrail və region rəsmilərinə istinadən məlumat yayıb.
Nəşrin məlumatına görə, Qətərin rəhbərlik etdiyi vasitəçilər Vaşinqtonla Tehran arasında birbaşa danışıqların bərpasına nail olmağa və noyabrın 3-də keçiriləcək seçkilərdən sonra yeni gərginliyin qarşısını almağa çalışırlar.
Cümə günü Qətər nümayəndələri Tehranda 12 saatdan çox davam edən danışıqlar aparıblar. Bu müddətdə onlar Ağ evlə daimi əlaqə saxlayıblar. Müzakirələrin Dohada davam etdirilməsi nəzərdə tutulur.
“Axios” mümkün razılaşma variantlarından biri kimi BMT müfəttişlərinin hücumlar nəticəsində zərər görmüş İranın nüvə obyektlərinə buraxılmasını göstərir. Bunun müqabilində ABŞ-ın sanksiyaları qismən yumşalda biləcəyi bildirilir.
Lakin tərəflər arasında ciddi fikir ayrılıqları qalmaqdadır. Vaşinqton İranın nüvə proqramı ilə bağlı güzəştlər tələb edir. Tehran isə dəniz blokadasının aradan qaldırılmasını və dondurulmuş vəsaitlərinin açılmasını istəyir.
Eyni zamanda, Netanyahu Trampı İrana qarşı yeni zərbələri dəstəkləməyə inandırmağa çalışır. “Axios”un məlumatına görə, ehtimal olunan əməliyyat İran rəhbərliyinə, enerji infrastrukturuna və nüvə obyektlərinə genişmiqyaslı hücumları əhatə edə bilər.
Nəşrin mənbələrinin iddiasına görə, ABŞ və İsrail hərbçiləri mümkün hərbi əməliyyatların bərpası üçün hazırlıqları əlaqələndirirlər.
Trampın ətrafında İrana qarşı növbəti addımlarla bağlı vahid mövqe yoxdur. Məsləhətçilərin bir qismi diplomatiyanın davam etdirilməsini müdafiə edir. Digərləri isə hesab edirlər ki, hərbi təzyiq artırılmadan İran Vaşinqtonun qəbul edə biləcəyi razılaşmaya getməyəcək.
ABŞ rəsmilərindən biri respublikaçıların seçkilərdə ciddi məğlubiyyətinin prezidentin qərarına təsir göstərə biləcəyini ehtimal edib. Ağ ev nümayəndəsi isə səsvermənin nəticələrinin qərar üçün həlledici amil olmayacağını bildirib.
Yeni hərbi kampaniya münaqişənin bütün regiona yayılması təhlükəsini yaradır. İran xəbərdarlıq edib ki, onun enerji infrastrukturuna zərbələr endiriləcəyi təqdirdə Fars körfəzi ölkələrindəki neft-qaz obyektlərini hədəfə ala bilər.
