Fransa xarici kəşfiyyat xidmətinin iki əməkdaşını Tbilisidən geri çağırıb.

Bu barədə kəşfiyyat və diplomatik münasibətlər üzrə ixtisaslaşmış Fransanın “Intelligence Online” nəşri məlumat yayıb.

Məlumata görə, onlar may ayında geri çağırılıb. Buna səbəb kimi, “Kartu Bank”ın keçmiş mətbuat katibi və maliyyə polisinin keçmiş yüksək vəzifəli əməkdaşı Georgi Udzilaurinin həbsi göstərilir.

O, mayın 5-də casusluq ittihamı ilə saxlanılıb.

Fransız nəşrinin məlumatına görə, Gürcüstan Dövlət Təhlükəsizlik Xidmətinin keçirdiyi əməliyyat iki ölkə arasında münasibətlərdə gərginliyə səbəb olub.

“Fransanın xarici kəşfiyyat xidməti Tbilisidəki iki əməkdaşını Parisə geri çağırmağa məcbur olub”, — nəşr yazır.

Bundan əlavə, Gürcüstan hakimiyyəti diplomatik münasibətlərin daha da pisləşməsinin qarşısını almaq üçün fransız kəşfiyyatçılarını “persona-non-grata” elan etməyib və yalnız ölkəni tərk etmələrini tələb etməklə kifayətlənib.

İddia olunur ki, Tbilisi bu tələbin yerinə yetirilməyəcəyi təqdirdə, onların kimliyini açıqlamaqla hədələyib.