Bu gün səhər saatlarında tanınmış jurnalist, Dövlət Şəhərsalma və Arxitektura Komitəsinin mətbuat katibi Ramiz İdrisoğlu “Araz Supermarket”in Zabitlər parkı filialında qarşılaşdığı xoşagəlməz hal barədə sosial şəbəkədə paylaşım edib. 

Qarabaginfo.az xəbər verir ki, Ramiz İdrisoğlu aldığı qaymaq məhsulunun daha öncə açıldığını və yenidən piştaxtaya qoyulduğunu sonradan aşkar etdiyini bildirib.

Jurnalist qeyd edib ki, bu hal istehlakçının etibarına açıq hörmətsizlikdir və satış siyasətində ciddi məsuliyyətsizlikdən xəbər verir. Ramiz İdrisoğlu əlavə edib ki, eyni mağazada Dr.Milk markalı ayranın son istifadə tarixinin bitmiş olduğunu da aşkarlayıb və bu barədə işçilərə xəbərdarlıq edib.

Məsələ ilə bağlı AQTA-ya da çağırış edən jurnalist, belə vəziyyətlərin yaranmasına səbəb kimi aşağı əməkhaqqı, motivasiyasızlıq və təlim çatışmazlığını göstərib. O, supermarket rəhbərliyini satış və keyfiyyət siyasətini təcili olaraq yenidən nəzərdən keçirməyə çağırıb.

Aidiyyəti qurumlar hələlik məsələ ilə bağlı münasibət açıqlanmayıb.