Bu gün Bakı Apellyasiya Məhkəməsində rüşvət almada iştirakçılıq ittihamı ilə həbs edilən tanınmış vəkil Elçin Sadıqovun məhkəməsi keçiriləcək.

Qarabaginfo.az-ın xəbərinə görə, bu barədə "Unikal"a vəkil Cavad Cavadov məlumat verib.

O qeyd edib ki, saat 15:00 keçirilməsi nəzərdə tutulan prosesə Bakı Apellyasiya Məhkəməsinin hakimi Zəki Babayev sədrlik edəcək. 

"Müəyyən prosessual əsaslar var. Düşünürəm ki, onun barəsində həbs qətimkan tədbiri seçilməyə də bilər", - deyə C.Cavadov bildirib.

Qeyd edək ki, ötən gün istintaq hərəkətləri ilə bağlı Elçin Sadıqov saxlanıldığı Dövlət Təhlükəsizliyi Xidmətinin istintaq təcridxanasından Baş Prokuroluğa aparılıb.
Xatırladaq ki, sentyabrın 10-da Baş Prokurorluq tərəfindən saxlanılan E.Sadıqov barəsində Cinayət Məcəlləsinin 32.5, 311.3.3-cü (külli miqdarda rüşvət almaqda köməkçilik) maddəsi ilə cinayət işi başlanıb. Binəqədi Rayon Məhkəmənin qərarı ilə 4 aylıq həbs qətimkan tədbiri seçilib.

E.Sadıqov öz müvəkkili, iş adamı Rasim Məmmədovun ailəsindən 20 min manat rüşvət alınaraq jurnalist Əvəz Zeynallıya verilməsində vasitəçilik etməkdə ittiham olunur.