İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA) 27 iyun - mikro, kiçik və orta sahibkarlar günü münasibəti ilə ABŞ-ın Nyu-York şəhərində keçirilmiş beynəlxalq konfransda iştirak edib.

Bu barədə Qarabaginfo.az-a Agentlikdən bildirilir.

Məlumata görə, tədbir BMT-nin Baş Qərargahında Kiçik Biznes üzrə Beynəlxalq Şuranın təşkilatçılığı, BMT-nin Ticarət və İnkişaf Konfransının (UNCTAD), Sənayenin İnkişafı Təşkilatının (UNIDO) və digər qurumların dəstəyi ilə “Davamlılıq və yenidənqurma: davamlı inkişaf üçün KOB-lar” mövzusunda baş tutub. KOBİA-nın İdarə Heyətinin sədri Orxan Məmmədov bütün dünyada olduğu kimi Azərbaycanda da KOB-ların məşğulluğa, iqtisadi artıma və davamlı inkişafa töhfə verdiyini qeyd edib, sahibkarların 99%-ni KOB-ların təşkil etdiyini vurğulayıb. O, Agentliyin fəaliyyəti, ölkəmizdə KOB-ların dəstəklənməsi üçün həyata keçirilən tədbirlər və dəstək alətləri barədə məlumat verib.

Dayanıqlı inkişaf məqsədlərinə, eləcə də iqtisadiyyatın davamlı inkişafına verdiyi töhfəyə görə BMT Baş Assambleyasının qətnaməsinə əsasən 27 iyun “Kiçik biznesin böyük təsiri” şüarı ilə 2017-ci ildən etibarən qeyd olunur. ABŞ-a işgüzar səfər çərçivəsində O. Məmmədov bu ölkənin Alhambra Palatasının həmtəsisçisi və idarəedici partnyoru xanım Anjum Malik ilə görüşüb. BMT-nin Baş Qərargahında təşkil olunmuş görüşdə palata və KOBİA arasında mümkün əməkdaşlığa, KOB-ların dəstəklənməsinə, Azərbaycan və ABŞ-ın biznes dairələri arasında yeni əlaqələrin qurulmasına dair fikir mübadiləsi aparılıb.

KOBİA-nın nümayəndələri səfər çərçivəsində Nyu-Yorkda yerləşən Türk evində olublar. O. Məmmədov və Türkiyənin Nyu-Yorkdakı Baş konsulu Reyhan Özgür arasında keçirilmiş görüşdə Azərbaycan və ABŞ-da fəaliyyət göstərən Türkiyə iş adamları arasında əməkdaşlıq imkanlarına, bu sahədə konsulluğun dəstəyinə dair fikir mübadiləsi aparılıb.

Səfər zamanı həmçinin O.Məmmədov Kiçik Biznes üzrə Beynəlxalq Şuranın prezidenti və baş icraçı direktoru Ayman ElTarabişi ilə görüşüb. Görüşdə əməkdaşlıq imkanları, təşkilat çərçivəsində biznes üzrə təlim-tədris proqramlarında KOBİA-nın təcrübəsinin tətbiqi və gələcəkdə təşkilata üzv qurumların iştirakı ilə KOB-ların dəstəklənməsinə həsr olunmuş tədbirlərin birgə təşkili imkanları nəzərdən keçirilib.