2022-ci ildə Qətərdə keçiriləcək dünya çempionatının daha bir iştirakçısı bəlli olub.

Qarabaginfo.az-ın məlumatına görə, Afrika zonası üzrə seçmə mərhələnin 3-cü raundunun cavab oyununda evdə Misiri məğlub edən Seneqal millisi final mərhələsinə vəsiqəni təmin edib.

Görüşün əsas vaxtı meydan sahiblərinin 1:0 hesablı qələbəsi ilə başa çatıb. Yeganə qolu 3-cü dəqiqədə Bulaye Dia vurub. İlk qarşılaşmada Misir yığması eyni hesabla qalib gəldiyindən əlavə vaxt oynanılıb. Lakin burada da qalib müəyyənləşməyib. Penaltilər seriyasında daha dəqiq oynayan (3:1) Seneqal seçməsi DÇ-2022-də iştirak hüququ qazanıb.

Qeyd edək ki, dünya çempionatı 21 noyabr - 18 dekabrda keçiriləcək. İndiyədək Seneqalla yanaşı, Qətər, Almaniya, Danimarka, Braziliya, Belçika, Fransa, Xorvatiya, İspaniya, Serbiya, İngiltərə, İsveçrə, Niderland, Argentina, İran, Cənubi Koreya, Səudiyyə Ərəbistanı, Yaponiya, Uruqvay, Ekvador, Kanada və Qana final mərhələsinə vəsiqə əldə edib.