Ağ Ev Moskvanın nüvə silahından istifadə edəcəyi halda Vaşinqton və onun müttəfiqlərinin cavab ssenariləri hazırlamaq üçün rəsmilərdən ibarət komanda formalaşdırıb.

Eyni zamanda, rəsmilər hadisələrin bu sayaq inkişafı ehtimalını kiçik hesab edirlər.

Onların sözlərinə görə, “Pələng” qrupu Rusiyanın NATO ölkələri ərazisində Ukraynaya göndərilən silah və yardım konvoylarına hipotetik hücumuna cavabları öyrənir.

Rəsmilər, həmçinin, Vaşinqtonun hərbi əməliyyatların qonşu ölkələrə, o cümlədən Moldova və Gürcüstana “yayılmasına” necə reaksiya verməli olduğunu və Avropa ölkələrini ukraynalı qaçqınların axınına necə hazırlamalı olduğunu müəyyən etməyə çalışır.

"Pələng"in yaradılması ilə bağlı sənədi Rusiyanın Ukraynada xüsusi əməliyyatının başlamasından 4 gün sonra prezidentin milli təhlükəsizlik üzrə köməkçisi Ceyk Sallivan imzalayıb. Qrup  artıq Rusiya Federasiyasına qarşı sanksiyaların tətbiqi, NATO ölkələrində qoşunların sayının artırılması və Ukrayna qoşunlarının silahlandırılması üçün təlimatların hazırlanmasında mərkəzi rol oynayıb.