Fransa "ABŞ-dan fərqli olaraq" öz səfirliyini fransız diasporunun əsas hissəsinin yerləşdiyi Kiyevdən köçürməyi planlaşdırmır. Bu barədə çərşənbə günü Fransanın xarici işlər naziri Jan-İv Le Drian Senatın (parlamentin yuxarı palatası) xarici əlaqələr komissiyasında çıxışı zamanı bildirib.

“Biz belə bir qərar verməmişik”, - deyə nazir bildirib. O qeyd edib ki, “Ukraynadakı Fransa vətəndaşlarının əsas hissəsi Kiyevdədir”. "Bu isə minə yaxın insandır. Biz onlarla daimi əlaqə saxlayırıq", - XİN rəhbəri bildirib. O, həmçinin qeyd edib ki, “Ukraynaya hələ də aviareyslər həyata keçirilir”.

Xatırladaq ki, bazar ertəsi ABŞ dövlət katibi Entoni Blinken ABŞ səfirliyinin Kiyevdən Lvova köçürüldüyünü bəyan edib.