Rusiya prezidentinin mətbuat katibi Dmitri Peskovun açıqlamasına görə, Vladimir Putin, İlham Əliyev və Nikol Paşinyan arasında videokonfrans formatlı görüşün keçirilməsi barədə hazırlıq davam edir. Onun sözlərinə görə, hələlik bu videokonfransın keçirilməsi ilə bağlı dəqiq razılşama yoxdur.

Bəs üçtərəfli görüş baş tutarsa, gedişatda hansı məsələlər öz həllini tapacaq?

Qarabaginfo.az-ın xəbərinə görə, Beynəlxalq münaqişələr üzrə ekspert, Rusiya Jurnalistlər Birliyinin üzvü Yevgeni Mixaylov Modern.az-a açıqlamasında bildirib ki, Rusiya, Azərbaycan və Ermənistan rəhbərlərinin təklif olunan sammit görüşündə sərhədlərin delimitasiyası və demarkasiyası prosesi həll ediləcək.

Onun sözlərinə görə, görüş zamanı erməni tərəfinin günahı ucbatından yaranmış bütün mübahisəli məsələlərin yekun həlli ilə bağlı substantiv razılaşmalar olacaq:

“Mən Azərbaycanın bu məsələdə mövqeyini tam başa düşürəm. Noyabr sazişləri Moskvanın zəmanəti ilə imzalanıb və İrəvan razılaşdığı sazişin bütün bəndlərini yerinə yetirməyə borcludur. Fikrimcə, gözlənilən görüşdə bütün məqamlara diqqət yetiriləcək və tam miqyaslı sülh müqaviləsinin imzalanmasına təkan veriləcək.

Bu görüşün nəticələri əsasında yeni müqavilə imzalanacaq. Bununla da İrəvan yenidən göz yaşlarına boğularaq, beynəlxalq normalara məhəl qoymamağa çalışacaq. Moskvanın da noyabr müqaviləsini imzalayarkən götürdüyü öhdəlikləri yerinə yetirməsi lazımdır”.