10 Noyabr üçtərəfli razılaşmasından bəri Rusiyanın nəinki Müdafiə Nazirliyi, elə Xarici İşlər Nazirliyi də rəsmi xəbər və açıqlamalarında “Dağlıq Qarabağ” birləşməsini işlətməkdə, Azərbaycanın rəsmi qurumları, o cümlədən Xarici İşlər Nazirliyi isə susmaqda  davam edir. Halbuki, Azərbaycan Prezidenti də dəfələrlə vurğulayıb ki, çağdaş Azərbaycan Respublikasının izibati ərazisində “Dağlıq Qarabağ” adlı inzibati ərazi vahidi yoxdur... Hətta bu günlərdə Rusiya Müdafiə Nazirliyinin rəsmi saytının Azərbaycan torpağındakı sülhməramlı kontingentlə bağlı bölməsində Laçın rayonu “Dağlıq Qarabağın Laçın rayonu” kimi təqdim edildi...

 

Qarabaginfo.az xəbər verir ki, mövzu ilə bağlı Moderator.az-a açıqlamasında araşdırmaçı jurnalist Elçin Alıoğlu aşağıdakıları söyləyib.

 

“Bəli, dəfələrlə deyilib ki, Azərbaycanda “Dağlıq Qarabağ”adlı  inzibati vahid yoxdur. Əvvəla, 1991-ci ildən Dağlıq Qarabağ Muxtar Vilayətinin(DQMV) ləğv olunması haqda Azərbaycan Respublikası Ali Sovetinin qərarı var.  İkincisi,  DQMV yoxdursa, Dağlıq Qarabağ da yoxdur.  Olan 28 il ərzində Dağlıq Qarabağ münaqişəsi idi. Onun da kökündə iki preambula vardı: birincisi, Ermənistan silahlı qüvvələrinin Azərbaycan ərazisində olması,  ikincisi,  Azərbaycan ərazilərinin işğal  faktoru.  44 günlük  Vətən müharibəsi Cənubi Qafqazda geo-siyasi reallığı dəyişdiyi kimi, bəhs edilən iki preambuladakı məsələni də aradan qaldırdı. Yəni artıq  nə Dağlıq Qarabağ var, nə də orada erməni qoşunları var. Ona görə də “Dağlıq Qarabağ”  söz birləşməsinin işlənməsi yanlışdır. Amma ruslar, yaxud ermənilər oraya, istədikləri kimi, “Papua-Qvineya” desinlər, “Madaqaskar” da deyə bilərlər. Bununla heç nə dəyişməyəcək...” 

 

Elçin Alıoğlu  “Sizin dediklərinizdən belə çıxır ki,  Azərbaycan dövlətinin Rusiyanın Müdafiə Nazirliyi və digər qurumlarının “Daqlıq Qarabağ” , “Daqlıq Qarabağın Laçın rayonu, yaxud Kəlbəcər rayonu” kimi yanlış inzibati birləşmələr işlətmələrinə reaksiya verməsinə ehtiyac yoxdur” sualını da cavablandırıb.

 

“Buna qətiyyən lüzum yoxdur... Qarabağ erməniləri deyirlər ki,  milli  müqəddəratı təyinetmə hüququ var. Tamam, var. “Biz  azad yaşamaq istəyirik”- Yaşayın.  “Azərbaycandan ayrı yaşamaq istəyirik”. Lap yaxşı,  biz etiraz etmirik. Laçın dəhlizi var, buyurun, Azərbaycan ərazisindən çıxın, gedin Ermənistanda öz milli müqəddəratınızı təyin edin. Rusiyada özünüzə status axtarın.  Çünki  Krasnodarda 200 min,  Moskvada 1 milyon,  Sankt-Peterburqda 400 min erməni yaşayır. Qarabağda faktiki yaşayan ermənilərin sayı-12  min çoxdur, yoxsa 1 milyon?  Gedin, qoşulun Rusiyadakı, yaxud Gürcüstandakı  Samse-Cavaxetiyadakı ermənilərə,  status  tələb edin. Laçın dəhlizi açıqdır. Ya  Azərbaycan qanunlarına tabe olacaqlar, ya da rədd olub gedəcəklər... İkisindən birini seçməlidirlər. Çünki əgər mən futbol neydançasına futbol oynamaq üçün girmişəmsə, orada deyə bilmərəm ki, mənim burada basketbol oynamaq hüququm var...  Basketbol oynamaq istəyən getsin basketbol arenasında oynasın.  Bu qədər bəsit...” –deyə   araşdırmaçı vurğulayıb.