12 günlük müharibə zamanı Azərbaycanın İsrailə yardım etdiyinə dair heç bir sübut yoxdur.

Bu barədə İranın Milli Təhlükəsizlik üzrə Ali Şurasının katibi Əli Laricani Khamenei.ir saytına müsahibəsində bildirib.

Laricani vurğulayıb ki, “Bakının açıqlamaları İran əleyhinə heç bir düşmənçilik hərəkətinin olmadığını göstərir”.

“Hazırda əsassız iddialarla hərəkət edə bilmərik”, – Laricani qeyd edib.

Onun sözlərinə görə, İranda 12 günlük müharibə zamanı Azərbaycanın İsraillə əməkdaşlığına dair heç bir sübut yoxdur: “Biz mötəbər faktlara əsaslanmalıyıq. Bəziləri nəyisə iddia edir, amma bizə sübut lazımdır. Azərbaycan hökuməti deyir ki, belə bir şey olmayıb. Bizim buna inanmamaq üçün heç bir əsasımız yoxdur. Nəzərə alın ki, Azərbaycan qonşu müsəlman ölkəsidir, mədəniyyət baxımından bizə yaxındır və dostdur. Digər qonşularla olduğu kimi bəzi məsələlərdə fikir ayrılığı ola bilər. Biz bu amili həmişə nəzərə alırıq. Bəzi sahələrdə dostluq, bəzi sahələrdə fikir ayrılıqları da ola bilər. Rusiya və Çin kimi ölkələrin İsraillə əlaqələri var, lakin biz öz maraqlarımız əsasında hərəkət edirik”, – Laricani bildirib.