Qarabaginfo.az bildirir ki, bu sözləri iqtisadçı ekspert Natiq Cəfərli ölkəyə idxal olunan yağlarla bağlı rəsmi açıqlamanı şərh edərkən bildirib.

Onun sözlərinə görə, bu ilin ilk 8 ayında (yanvar-avqust) ölkəyə 19 153,76 ton kərə yağı idxal olunub, Gömrük komitəsində rəsmiləşdirilən statistik dəyəri isə 103 mln. 312 min dollar təşkil edib: “Yəni, hər kq kərə yağı ölkəmizə 5,3 dollara, 9 manat 10 qəpiyə daxil olub. Marketlərdə kərə yağının kilosu 18-25 manat arası dəyişir, yəni, ortalama, 20-21 manat civarındadır. Kəra yağı gətirən şirkətin vergisi, daşınması, gəliri, satış nöqtələrinin gəliri – hamısı 50% civarında hesablasaq, qiymət 15-16 manatdan baha olmazdı”.

Ekspert qeyd edib ki, rəqabət olmadığı üçün qiymət bahadır: “Ölkəyə yağ gətirən şirkət sayı azdır. Yerli istehsal isə yox dərəcəsindədir . Yerli şirkətlər adı ilə bazara çıxarılan kərə yağının tərkibi yerli deyil, xaricdən gətirilir, sadəcə burada qablaşdırılır və satışa çıxarılır. Hələ qablaşdırılan zaman onun tərkibi ilə yaxşıca oynayırlar, daha ucuz heyvan-bitki mənşəli yağlar qatırlar. Maya dəyərini 20-30% aşağı çəkirlər ki, bu da gəlirlərini kəskin artırır”.

N. Cəfərli deyib ki, rəqabət olmayan yerdə qiyməti diktə etmək çox asandır: “Bizdə Antiinhisar qurumları topdan yox, pərəkəndə satanlarla “mübarizə” aparır.