Gürcüstan parlamentinin müxalifəti təmsil edən deputatı Qriqol Vaşadze hakim partiyanın xarici agentlər haqqında qanunun qəbuluna növbəti cəhdi ilə əlaqədar deputat mandatından imtina etdiyini və parlamenti tərk etdiyini elan edib.

Qarabaginfo.az Gürcüstan mətbuatına istinadən xəbər verir ki, Vaşadze istefa bəyanatı yayıb.

“Mövcudluğun heç bir hüquqi, siyasi, mənəvi və ya praqmatik əsaslandırması yoxdur, nəinki qanun layihəsinin qəbulu... Bu qanun layihəsi qanuna çevrilərsə, son nəticədə avtoritar rejimin qurulması üçün istifadə olunacaq.... Bu şəraitdə, Parlamentdə olmağın mənim üçün heç bir mənası yoxdur, mən parlamenti tərk edirəm”, - Qriqol Vaşadzenin bəyanatında deyilir.

Qeyd edək ki, Vaşadze bitərəf deputat statusuna malikdir. Keçmiş karyera diplomatı kimi SSRİ Xarici İşlər Nazirliyində işləyib. Qızılgül inqilabından sonra Mixail Saakaşvili onu və həyat yoldaşı, balerina Nino Ananiaşvilini Gürcüstana qayıtmağa dəvət edib. Saakaşvili dövründə hökumətdə Vaşadze mədəniyyət və idman naziri, daha sonra xarici işlər naziri (2008-2012) vəzifələrində çalışıb. 2018-ci ildə o, Gürcüstan prezidentliyinə namizədliyini irəli sürüb və ikinci turda Salome Zurabişviliyə uduzub. O zaman Zurabişvili “Gürcü Arzusu” tərəfindən dəstəklənirdi. Qriqol Vaşadze 2019-2020-ci illərdə hazırda həbsdə olan sabiq prezident Mixail Saakaşvilinin qurduğu Vahid Milli Hərəkat Partiyasına sədrlik edib.