Yaponiyada uşaq bezləri istehsalçısı doğum nisbətlərinin rekord dərəcədə azalmasından sonra uşaq bazarından çəkildiyini və böyüklər bazarına üz tutduğunu açıqlayıb.

Qarabaginfo.az BBC-yə istinadən xəbər verir ki, Yaponiya əhalisi sürətlə qocalır.

Ölkədə yaşlı insanlar üçün bez satışı bazarı uşaq bezləri bazarını geridə qoyub. Ümumilikdə 2023-cü ildə Yaponiyada 758 631 nəfər doğulub. Bu, əvvəlki illə müqayisədə 5,1 faiz azalma deməkdir. Bu, həm də XIX əsrdən bəri ölkədə qeydə alınan ən aşağı doğum sayıdır. 1970-ci illərdə bu rəqəm hər il iki milyondan çox olub.

"Oji Holdings" şirkətindən verilən açıqlamada 2001-ci ildəki 700 milyon uşaq bezi istehsalı ilə pik həddə çatdığı dövrdən bu yana istehsalın azaldığı qeyd edilib. Şirkət bu il 400 milyon uşaq bezi istehsal etdiyini açıqlayıb. Yaponiyanın ən böyük uşaq bezi istehsalçısı "Unicharm" 2011-ci ildə böyüklər üçün uşaq bezlərinin satışlarının uşaq bezlərini üstələdiyini elan edib.

Ölkədə durmadan yaşlanan böyüklər üçün uşaq bezləri bazarının dəyəri 2 milyard dolları ötür. Yaponiya hazırda dünyanın ən yaşlı əhalisi olan ölkələrdən biridir. Ölkə əhalisinin təqribən 30 faizi 65 yaş və yuxarıdır. Ötən il yaşı 80-dən yuxarı olan insanların nisbəti ilk dəfə olaraq 10%-i ötüb.

Mövcud vəziyyət dünyanın dördüncü böyük iqtisadiyyatı olan Yaponiya üçün böhrana çevrilib. Yaponiya hökumətinin əhalinin qocalması probleminin həlli istiqamətindəki səyləri də indiyədək uğurlu olmayıb. Uşaqlı ailələrə dəstək kimi stimul paketləri doğum nisbətlərini artırmır. Mütəxəssislər qeyd edirlər ki, evlilik nisbətlərinin aşağı olması, qadınların daha çox işə qoşulması və uşaq böyütmək xərclərinin artması kimi səbəblər bu vəziyyətdə rol oynayır.

Vəziyyətin ciddiliyini vurğulamaq üçün Yaponiyanın Baş naziri Fumio Kişida ötən il demişdi ki, Yaponiya işlək cəmiyyət olmaqda hüdudlardadır. Yaponiya ilə yanaşı, Honq-Konq, Sinqapur, Tayvan və Cənubi Koreyada da doğum göstəriciləri durmadan aşağı düşür. Çində də 2023-cü il üzrə ikinci il dalbadal azalma qeydə alınıb.