Belarus prezidenti Aleksandr Lukaşenko Ukrayna xalqını qarşıdurmaya son qoymaq üçün qonşuluqdan istifadə etməyə çağırıb və Minskin bunun üçün lazım olan hər şeyi etməyə hazır olduğunu bildirib.
 

Qarabaqinfo.az xəbər verir ki, Belarus prezidentinin mətbuat xidmətinin məlumatına görə, Lukaşenko “qardaş Ukrayna xalqını Müstəqillik Günü münasibətilə” təbrik edib.
 

“Otuz ildən artıqdır ki, müstəqillik əldə etmiş hər iki ölkə öz inkişafının, gələcəyin qurulmasının müstəqil yollarını seçib və bunun üçün biz bütün regionun layiqli birgə yaşaması üçün təhlükəsiz imkanlar yaratmalıyıq. Biz qarşıdurmaya son qoymaq üçün qonşuluq dəyərlərindən istifadə etməliyik. Belarus tərəfi bunun üçün lazım olan hər şeyi etməyə hazırdır. İnanıram ki, biz bunu edə bilərik”, - mətbuat xidməti təbrikdən sitat gətirib.

Lukaşenko Ukraynanın bütün sakinlərinə arzu edib ki, çox qısa müddətdə bütün xoşməramlı insanlar üçün zəruri olan əvəzsiz sülh onların torpaqlarında hökm sürsün.
 

“Belarusların və ukraynalıların bir çox nəsilləri əsrlər boyu mehribanlıq və hörmət şəraitində yaşayıblar. Əsrlər boyu əcdadlarımız ticarətlə məşğul olub, ailələr yaradıb, övlad böyütüb, birlikdə faşizmə qarşı cəsarətlə mübarizə aparıb, müharibədən sonrakı ilk beşillik planlarında ümumi dövləti bərpa ediblər”, - təbrikdə deyilir.

Lukaşenko vurğulayıb ki, bu gün də iki ölkənin xalqlarını əməksevərlik, ağsaqqallara və öz adət-ənənələrinə hörmət, orijinal mədəniyyət kimi xarakter xüsusiyyətləri birləşdirib.