Bir çox insan səhər yuxudan oyanarkən özünü yorğun hiss edir və hətta güclü qəhvə belə onları tam ayıltmağa kömək etmir. Somnoloqların fikrincə, bunun səbəbi hər kəs üçün eyni olan “ideal yatmaq saatının” mövcud olmamasıdır. Əsas məsələ insanın fərdi bioloji ritmini və orqanizmin xüsusiyyətlərini nəzərə almasıdır.
Bu barədə EatingWell yazır.
Yatmaq vaxtını necə müəyyənləşdirmək olar?
Mütəxəssislər bildirirlər ki, insanların sirkadiyan ritmləri fərqlidir. Bəzi insanlar erkən yatıb səhər tez oyanmağa üstünlük verir, digərləri isə gec saatlarda daha məhsuldar olur.
Yuxu rejimini müəyyənləşdirmək üçün mütəxəssislər əvvəlcə səhər dəqiq neçədə oyanmalı olduğunuzu müəyyən etməyi məsləhət görürlər.
Daha sonra bu vaxtdan geriyə doğru 7-9 saat hesablamaq lazımdır. Bu, böyüklər üçün tövsiyə olunan yuxu müddətidir.
Əsas şərtlərdən biri isə rejimə mütəmadi əməl etməkdir. Həftəsonu yuxu saatlarının kəskin dəyişdirilməsi də orqanizmin bioloji ritmini poza bilər.
Kifayət qədər yatdığınız halda niyə yorğun olursunuz?
Yuxunun müddəti kifayət qədər olsa belə, insan səhər özünü halsız və yorğun hiss edə bilər. Mütəxəssislərin fikrincə, burada yuxunun fasiləsizliyi və keyfiyyəti də mühüm rol oynayır.
Gecə ərzində tez-tez oyanmaq və uzun müddət oyaq qalmaq beynin bərpa proseslərinə mənfi təsir göstərə bilər.
Əgər düzgün yuxu rejiminə baxmayaraq yorğunluq davam edirsə, həkimə müraciət etmək və mümkün yuxu pozuntularını araşdırmaq tövsiyə olunur.
Daha yaxşı yatmaq üçün 4 sadə qayda
Mütəxəssislər “ideal yuxu saatı” axtarışında həddindən artıq narahat olmamağı, bunun əvəzinə gündəlik faydalı vərdişlər formalaşdırmağı məsləhət görürlər:
Səhərlər günəş işığı qəbul edin. Bu, sirkadiyan ritmin tənzimlənməsinə kömək edir.
Mütəmadi fiziki aktiv olun.
Yatmazdan 6-8 saat əvvəl kofeindən uzaq durun.
Yuxudan təxminən bir saat əvvəl telefon və digər elektron cihazlardan istifadəni dayandırın. Bunun əvəzinə kitab oxumaq və ya sakit gəzintiyə çıxmaq olar.
