Almaniya Azərbaycanın beynəlxalq səviyyədə tanınmış sərhədləri daxilində ərazi bütövlüyünü dəstəkləyir.

Qarabaginfo.az xəbər verir ki, bu barədə APA-nın sorğusuna cavab olaraq Almaniya hökumət sözçüsünün müavini Volfqanq Büşner ötən gün Berlində Almaniya Kansleri Olaf Şoltsun Ermənistan Baş naziri Nikol Paşinyanla birgə mətbuat konfransında fikirlərinə aydınlıq gətirərkən bildirib.

“Kansler dünən Ermənistanın Baş naziri Paşinyanla görüşüb. Bölgədən bizə müraciət edildi ki, yenidən Dağlıq Qarabağla bağlı federal hökumətin mövqeyini təqdim edək. Federal hökumətin mövqeyi dəyişməyib. Almaniya Ermənistan və Azərbaycanın beynəlxalq səviyyədə tanınmış sərhədləri daxilində ərazi bütövlüyünə sadiq qalır. Almaniya Ermənistan və Azərbaycanı mübahisəni dinc yolla həll etməyə çağırır”, - o vurğulayıb.

Qeyd edib ki, Almaniya üçün hər iki ölkədə sakinlərin haqlarına və azlıqların hüquqlarına beynəlxalq normalara və götürülmüş öhdəliklərə uyğun olaraq hörmət edilməsi vacibdir.

“Federal Hökumət Avropa İttifaqı Şurasının prezidenti Şarl Mişelin səylərini açıq şəkildə dəstəkləyir”, - Volfqanq Büşner əlavə edib.