Böyük Britaniya kraliçası II Yelizavetanın ikinci oğlu, York hersoqu Endryu əlahəzrət titulundan istifadə etmək hüququndan məhrum edilə bilər.

Qarabaginfo.az xəbər verir ki, bu barədə “The Sunday Times” qəzeti yazıb.

Qeyd olunub ki, şahzadə Endryu Amerika məhkəməsində 17 yaşlı qızın zorlanması işini uduzsa, Böyük Britaniya kraliçası belə bir qərar verə bilər.

Nəşrin Britaniya kral ailəsinin əhatəsində olan mənbələrinin bildirdiyinə görə, hazırda krallıqda özünü şahzadənin qurbanı adlandıran Virciniya Jufrenin (nikahdan əvvəl - Roberts) məhkəmədə qalib gələcəyi təqdirdə hansı işlərin görüləcəyi ilə bağlı fəaliyyət planlarını fəal şəkildə müzakirə edilir.

Əgər məhkəmə Şahzadənin xeyrinə qərar qəbul etməsə, o ABŞ-a ekstradisiya təhlükəsi səbəbindən ölkəni tərk edə bilməyəcək, daha təvazökar yaşamaq məcburiyyətində qalacaq və yəqin ki, Kral Lojasından köçəcək.

İşin xoşagəlməz nəticəsi olduğu təqdirdə, şahzadədən rəsmi tituldan istifadəni dayandırmaq, fəxri hərbi rütbələrdən və çoxsaylı xeyriyyə təşkilatlarının himayədarı rolundan imtina etmək də tələb olunacaq.

Jufrenin iddiası ilə bağlı növbəti məhkəmə iclası yanvarın 4-də Nyu-Yorkun Cənub Dairə Məhkəməsində keçirilməlidir. Əlahəzrətin müdafiəsi işin rəsmi əsaslarla dayandırılmasını istəyir. Şahzadənin nümayəndələri sübut etməyə çalışırlar ki, iddiaçı çoxdan Avstraliyaya köçüb, orada daimi yaşayır və buna görə Jufrenin doğulub böyüdüyü ABŞ-da bu işə baxıla bilməz.

Onlar həmçinin 2009-cu ildə Jufre ilə amerikalı iş adamı Cefri Epşteyn arasında məhkəmədənkənar razılaşmaya istinad edərək iddia edirlər ki, qadın daha sonra həm Epşteynin özünü, həm də Şahzadə Endryu da daxil olmaqla tanışlarını mühakimə etməkdən imtina edəcəyinə söz verib. Qadının o zaman aldığı məbləğ və cinsi istismarda ittiham etdiyi maliyyəçiyə qarşı iddialardan imtina şərtləri ictimaiyyətə açıqlanmayıb.