“Lukoil-Moldova” (Rusiyanın iri neft şirkətlərindən biri olan “Lukoil”un törəmə müəssisəsi) ilə ABŞ sanksiyalarının respublika ərazisində tətbiqi barədə danışıqlar pozitiv şəkildə gedir.

Qarabaginfo.az xəbər verir ki, bu barədə “TASS” Moldovanın energetika naziri Dorin Junqetuya istinadən məlumat yayıb.

“Onlar irəli gəlirlər, söhbət və danışıqlar kifayət qədər pozitiv notda gedir, yəni açıqlıq var. Amma bəzi yekun qərarlar, əlbəttə ki, [rəhbərliklə] razılaşdırılacaq”, - Dorin Junqetu qeyd edib.

Onun sözlərinə görə, “Lukoil-Moldova”nın payına respublikanın benzin idxalının təxminən 50%-i və dizel yanacağı idxalının 30%-i düşür. Bundan əlavə, şirkət bütün yanacaqdoldurma məntəqələrinin təxminən 20%-nə malikdir, o həmçinin Kişineu aeroportuna xidmət göstərir. Kişineu aeroportuna gəldikdə isə, buradakı yanacaq kompleksini “Lukoil-Moldova” artıq dövlətə əvəzsiz istifadəyə verib.

“Paralel olaraq bu infrastrukturun alınması üzrə danışıqlar aparılır. Aktivlərin qiymətləndirilməsi həyata keçirilir”, - nazir vurğulayıb.

O əlavə edib ki, neft şirkəti artıq ölkədəki yanacaqdoldurma məntəqələrinin alınması barədə təkliflər alıb.

Daha əvvəl Dorin Junqetu qeyd etmişdi ki, 21 noyabrdan “Lukoil” respublikanın sanksiyalara qoşulması səbəbindən Moldovada fəaliyyətini davam etdirmək imkanını itirəcək.

Xatırladaq ki, ABŞ Maliyyə Nazirliyi 22 oktyabr tarixində “Lukoil” və onun 50%-dən çox paya sahib olduğu törəmə şirkətlərinə qarşı sanksiyalar tətbiq edib. Onlarla olan bütün əməliyyatlar 21 noyabr tarixinədək başa çatdırılmalıdır. Avropa İttifaqı isə 23 oktyabrda açıqlanan 19-cu sanksiya paketinin çərçivəsində Dubayda yerləşən “Lukoil”un ticarət bölməsi “Litasco Middle East DMCC”yə qarşı məhdudiyyətlər tətbiq edib.