Çində alimlər təxminən 10.000 il əvvəl diametri  30 metr olan asteroidin toqquşması nəticəsində əmələ gələn qədim  krateri kəşf ediblər.

Qarabaginfo.az-ın məlumatına görə, bu barədə South China Morning Post xəbər verir.

Quandun əyalətində, Çjaoqin şəhəri yaxınlığında yerləşən krater Çində təsdiqlənmiş beşinci belə kraterdir.

Tədqiqatçıların fikrincə, toqquşma nəticəsində yayılan enerji nəhəng olub. 600.000 ton TNT-yə bərabər olan bu enerji Xirosimaya atılan təxminən 40 atom bombasının gücündə olub. Kraterin diametri təxminən 900 metrdir və təpənin yamacında yerləşir. Krater ərazisindəki geoloji təbəqələrin və mineralların təhlili onun mənşəyini asteroid toqquşması kimi təsdiqlənib və tədqiqatçılara onun yaşını və məhv olma dərəcəsini müəyyən etməyə imkan verib.

Alimlər qeyd edirlər ki, belə bir kraterin kəşfi təkcə bölgənin geoloji tarixini anlamağımızı artırmaqla yanaşı, həm də kosmik obyektlərlə gələcək toqquşma risklərini qiymətləndirmək üçün dəyərli məlumatlar təqdim edir. Mütəxəssislər hesab edirlər ki, qədim toqquşmaların öyrənilməsi potensial asteroid toqquşmalarının nəticələrini proqnozlaşdırmağa və Yer kürəsini qorumaq üçün strategiyalar hazırlamağa kömək edir.

Bundan əlavə, Quanqdon krateri göstərir ki, hətta nisbətən kiçik asteroidlər belə müəyyən bucaq altında və yüksək sürətlə Yerə dəysə, böyük dağıntılara səbəb ola bilər. Bu kəşf planet üçün təhlükə yarada biləcək kosmik obyektlərin davamlı monitorinqinin vacibliyini vurğulayır.