Yaxın vaxtlarda Ermənistan və Türkiyə nümayəndələrinin Gümrü-Qars dəmir yolunun bərpası və istifadəyə verilməsi məsələləri ilə bağlı dövlətlərarası görüşü keçiriləcək.

Qarabaginfo.az xəbər verir ki, bu barədə “Armenpress” ölkənin Ermənistan-Türkiyə münasibətlərinin normallaşması prosesində xüsusi nümayəndəsi, parlamentin vitse-spikeri Ruben Rubinyana istinadən məlumat yayıb.

“Ən yaxın vaxtlarda Gümrü-Qars dəmir yolunun bərpası və fəaliyyəti ilə bağlı dövlətlərarası görüş keçiriləcək. Görüşdən sonra ətraflı məlumat veriləcək”, — Ruben Rubinyan bildirib.

Xatırladaq ki, 2025-ci ilin 12 sentyabrında İrəvanda Ermənistan-Türkiyə münasibətlərinin normallaşması prosesində xüsusi nümayəndələri Ruben Rubinyan və Serdar Kılıç arasında görüş keçirilib. Görüş nəticəsində tərəflər razılaşıblar ki, Ermənistan və Türkiyə aidiyyəti orqanları Gümrü-Qars dəmir yolunun və elektrik verilişi xəttinin bərpası və istifadəyə verilməsi üçün zəruri texniki araşdırmaları həyata keçirəcəklər.