Avropa Komissiyası müharibənin sonunda Ukraynanın bərpası üçün təxminən 200 milyard avro dondurulmuş Rusiya aktivlərinin istifadəsi sxemini hazırlayır.

Qarabaginfo.az xəbər verir ki, bu haqda məlumatı bir neçə avropalı rəsmiyə istinadən “Politico” yayıb.

Məlumata görə, bu şənbə Danimarkanın Kopenhagen şəhərində Aİ-nin xarici işlər nazirləri arasında baş tutacaq qeyri-rəsmi görüşdə aktivləri Ukrayna üçün daha çox gəlir gətirə biləcək və Rusiya döyüşləri dayandırmaqdan imtina etdikcə, ona təzyiqi artıracaq riskli investisiyalara yönəltmək planları müzakirə ediləcək.

“Biz Ukraynanın müdafiəsi və yenidənqurulmasına töhfə vermək üçün Rusiyanın dondurulmuş aktivləri üzərində işləri irəlilədirik”, — Avropa Komissiyasının Prezidenti Ursula von der Leyen bildirib.

“Politico”nun yazdığına görə, çoxları bu sxemi aktivlərin müsadirə olunması və Ukraynaya ötürülməsi üçün bir addım kimi görürlər ki, bu da Rusiyanın müharibədən sonra təzminat ödəməkdən imtina etməsinə cəza ola bilər.