Vladimir Putin Ukrayna prezidenti Vladimir Zelenski ilə söhbətində ondan soruşub ki, atası İkinci Dünya Müharibəsi zamanı faşistlərlə vuruşduğu halda niyə “neonasistləri” dəstəkləyir.

Qarabaginfo.az bildirir ki, Rusiya prezidenti bu barədə amerikalı jurnalist Taker Karlsona müsahibəsində danışıb.

“Onun atası İkinci Dünya Müharibəsi zamanı nasistlərə qarşı vuruşub. Bir dəfə onunla bu haqda danışmışdım. Dedim: “Volodya, sən nə edirsən? Atanız faşizmlə vuruşduğu halda, niyə bu gün Ukraynada neonasistləri dəstəkləyirsiniz?” Onun nə cavab verdiyini sizə deməyəcəyəm. Bu, ayrıca mövzudur və hesab edirəm ki, mənim bunu etməyim düzgün deyil”, – Putin bildirib.

Rusiya prezidenti bu barədə Zelenskinin münaqişənin həlli ilə bağlı Moskva ilə danışıqlar aparmaqda müstəqil olub-olmaması sualına cavab verərkən deyib.

Putinin sözlərinə görə, belə bir azadlıq var, “ən azı əvvəllər belə idi”.

“O, Ukraynanı sülhə aparacağına dair gözləntiləri əsasında hakimiyyətə gəlib. Bu barədə danışırdı. Məhz bunun sayəsində o, böyük səs çoxluğu ilə seçkilərdə qalib gəldi.  O, özünü dövlət başçısı hesab edir. Seçkidə qalib gəlib. Baxmayaraq ki, biz  Kiyevdəki 2014-cü il dövlət çevrilişini ondan sonra baş verən hər şey üçün əsas güc mənbəyi olduğuna inanırıq. Və bu mənada bu gün də hökumət mükəmməl deyil.”, – Rusiya prezidenti qeyd edib.

Putinin sözlərinə görə, hakimiyyətə gəldikdən sonra Zelenski başa düşdü ki, neonasistlər və millətçilər aqressiv və çox fəal  olduqları üçün onlarla münaqişəyə girmək olmaz. Bundan əlavə, Qərb Rusiya ilə qarşıdurmada onları dəstəkləyir. “Bu sərfəli və təhlükəsizdir. O, öz xalqına Ukraynada müharibəni dayandıracağını vəd etməsinə baxmayaraq, hazırkı mövqeni tutdu. O, seçicilərini aldadıb”, – prezident əlavə edib.(azpost.info)