“İftarda olduğu kimi, səhərlər də adətən yüngül yeməklər qəbul edirik. İnsanlar var ki, iftarda yediyi xörəklərdən imsakda da yeyir. Amma mən baldan və kənddən gətirilmiş təmiz nehrə yağından müəyyən miqdarda istifadə edirəm”.

 

Qarabaginfo.az xəbər verir ki, bunu Moderator.az-a açıqlamasında mübarək  Ramazan ayı boyu imsak və iftar zamanı hansı qidaları qəbul etməsindən danışan tanınmış din xadimi, Qafqaz Müsəlmanları İdarəsi sədrinin müavini Hacı Fuad Nurullayev söyləyib.

 

“İftarı Peyğəmbərimizin(s.ə.sə) buyurduğu kimi, ilıq su və xurma ilə açırıq ki, su insanın qida yolunu yuyur və saflaşdırır. Və bizdə bir ailə ənənəsi də var: iftarda süd və düyü unundan bişirilən “firni” deyilən xörəyi qəbul edirik. Bir də çalışdığımız qədər sulu xörəklərdən, qidalardan istifadə edirik ki, mədədə sıxıntı və çətinlik yaranmasın... Çolpa supu, eləcə də bozbaş kimi xörəkləri də yeyirik. Arada  plov da bişiririk. Amma onu hər gün yemirik ki, ağırlıq olmasın”-deyə həmsöhbətimiz davamında bildirib. 

 

Din xadimi oruc tutanlara digər bir sıra məsləhətlər də verib:

 

“Bilməyənlər üçün onu da deyim ki, azan əsnasında iftarı açandan sonra şam namazını qılıb sonra digər xörək və içkilər  qəbul etmək məsləhətdir. Çünki bir az fasilə olmalıdır ki, mədə dərhal yüklənməsin... Ümumiyyətlə, öncə dediyim kimi, Ramazanda insan mümkün qədər yüngül qidalanmalıdır ki, o qida onun mədəsini və digər orqanlarını sıxıb əziyyət yaratmasın...

 

Onu da deyim ki, mən, ümumiyyətlə, digər aylarda da çox qida qəbul edən deyiləm. Çünki artıq 10 ildir ki, çəkimi boyuma uyğun olaraq saxlayıram. Boyum 1,75 metrdir, çəkimin də 75 kiloqramı ötməsinə imkan vermirəm. Hər gün piyada 8-10 km gəzməyi özümə gündəlik adət etmişəm... Səhərlər  yüngülvari digər idman təmrinləri edirəm. Rayona gedəndə oradakı həyət-bacamızda ağacları budamaq, diblərinin bellənməsi və s. kimi yüngül fiziki işlər görürəm...

 

Biz Ramazanda mədəmizdən çox, maksimum ruhiyyətimizi, mənəviyyatımızı qidalandırmalıyıq. Namazlarla, dualarla, zikrlərlə... Mən Ramazanda vaxtımın çoxunu Quran oxumağa sərf edirəm. Və gecələr də çalışıram oyaq qalıb müxtəlif ibadətlər edəm. Əslində mömin bu şeyləri deməməli, qabartmamalıdır. Sadəcə, məlumat üçün, digərlərinə yaxşı nümunə göstərmək məqsədi ilə sizə deyirəm”- deyə şeyxülislamın müavini vurğulayıb.