Belarusun paytaxtı Minsk şəhəri yaxınlığındakı Maçulişçi hərbi aerodromunda partlayış törədilib.

Qarabaginfo.az xəbər verir ki, bu barədə Belarus hüquq-mühafizə orqanlarının keçmiş əməkdaşlarının yaratdığı "Bypol" kanalı məlumat yayıb.

Bildirilir ki, partlayış zamanı Rusiya hərbi hava qüvvələrinin A-50 erkən xəbərdarlıq təyyarəsi zədələnib.

"Reuters" agentliyi hücumun Belarus partizanları tərəfindən törədildiyini açıqlayıb. Məlumata görə, iki partlayış nəticəsində təyyarənin ön və mərkəzi hissələri, avionika və radar antenası zədələnib.

Maçulişçi aerodromunda törədilən partlayış barədə məlumatlar Belarus və Rusiyanın hərbi kanallarında da yayılıb.

"Bypol"un rəhbəri Aleksandr Azarovun sözlərinə görə, hücum pilotsuz uçuş aparatları ilə həyata keçirilib.  "Partlayışı törədənlər artıq ölkədən kənara çıxıb", - deyə o qeyd edib. Bildirib ki, bir neçə aydır hücuma hazırlıq gedirdi.

"Bypol" 2020-ci ilin sonunda Belarusda keçirilən prezident seçkilərinin rəsmi nəticələrinə etirazlar fonunda ölkənin hüquq-mühafizə orqanlarının keçmiş əməkdaşları tərəfindən təsis edilib. Belarus Ali Məhkəməsi onu terror təşkilatı kimi tanıyıb.