İstanbulda IX “Necip Fazıl” mükafatlarının təqdimetmə mərasimi keçirilib.

Qarabaginfo.az xəbər verir ki, Türkiyənin “Star” qəzeti tərəfindən təşkil olunan mərasim bu il “Yük kimin çiynində” mövzusu əsasında baş tutub.

Mükafata layiq görülənlər arasında Azərbaycanın Xalq yazıçısı Elçin Əfəndiyev də var.

“Beynəlxalq mədəni-sənət” nominasiyası üzrə mükafatlandırılan yazıçıya mükafatı Türkiyə Prezidenti Rəcəb Tayyib Ərdoğan təqdim edib.

Türkiyə Prezidenti çıxışında Elçin Əfəndiyevin müxtəlif dillərə tərcümə edilən əsərləri ilə qəlbləri fəth etdiyini deyib.

"Türkiyə-Azərbaycan dostluğunun, səmimiyyətinin, həmrəyliyinin dünyada nümunə kimi göstərildiyi bir dövrdə verdiyimiz bu mükafat xüsusi məna daşıyır", - Ərdoğan bildirib.

Qeyd edək ki, ümumilikdə altı nominasiya üzrə təqdim edilən mükafata “Şeir” nominasiyası üzrə şair Mehmet Can Doğan, “Hekayə-roman” nominasiyası üzrə Ayşegül Genç, “Fikir-araşdırma” nominasiyası üzrə Mustafa Özel, “İlk əsərlər” nominasiyası üzrə Elif Genç, “İlk əsərlər” nominasiyası üzrə Can Acer və “Hörmət” nominasiyası üzrə İlhami Atalay layiq görülüb.