Ötən gün Mingəçevir şəhərinin Nəriman Nərimanov küçəsi 15 ünvanında 1995-ci il təvəllüdlü İbişsoy Rüfanə Elxan qızı 5 mərtəbəli binanın 4-cü mərtəbəsindən yerə yıxılıb. Sağ baldır nayihəsindən açıq və qapalı travma alan qadın dərhal xəstəxanaya yerləşdirilib. Hazırda onun vəziyyəti stabildir.
Rüfanə İbişsoy özünün kirayədə yaşadığı mənzilin pəncərəsindən deyil, qapı qonşusu Xanım Qasımovanın pəncərəsindən yıxılıb. Ev sahibinin sözlərinə görə, hadisə zamanı ailə üzvləri həyətdə, qapıları isə bağlı olub.
Bir uşaq anası olan Rüfanə İbişsoyla zərərçəkənlər arasında yaxın qonşuluq münasibəti olduğundan ondan şübhələnməyiblər.
DİN-in Mətbuat Xidmətinin Şəki regional qrupunun baş inspektoru, polis baş leytenantı Mahir Məsimov "Unikal"a bildirib ki, həmin faktla bağlı hazırda Mingəçevir Şəhər Polis Şöbəsinin İstintaq bölməsində araşdırma aparılır. Qadının hansı məqsədlə qonşusuna məxsus mənzilə icazəsiz daxil olması aparılan araşdırmalardan sonra məlum olacaq və nəticədən asılı olaraq əmələ hüquqi qiymət veriləcək.
X.Qasımova evə qalxan zaman açar qapını açmayıb. Elə bu zaman 27 yaşlı qadın özünü pəncərədən yerə atıb. Qadının digər qonşusu da bir müddət öncə açarının və bank kartının müəmmalı şəkildə itdiyini deyib. O zaman marketlərdən birində kartındakı hesabdan alış-veriş edilib və bu barədə polisə də məlumat verilib. Hadisənin baş verdiyi mənzilin sahibi X.Qasımova isə müxtəlif vaxtlarda evindən 3 min manat dəyərində qızıl və nağd pulun oğurlandığını bildirib.
