“Azərbaycan üçün hərbi yol risklidir, çünki bu halda Rusiya 2008-ci ildə Gürcüstana qarşı tətbiq etdiyi Cənubi Osetiya ssenarisinə əl ata bilər. Yəni, “sülhməramlıları” qorumaq adı altında bölgəyə əlavə hərbi güc yeritmək ki, bu da heç bir halda Azərbaycanın maraqlarına cavab vermir”.

 

Qarabaginfo.az xəbər verir ki, bu fikirləri Moderator.az əməkdaşının “Rusiya hərbi kontingenti Yuxarı Qarabağda mövcud ola-ola Azərbaycan dövləti Xankəndi, Xocalı, Əsgəran, Ağdərə, Xocavənd və s. üzərində də yurisdiksiyasını bərpa edə biləcəkmi?” sualını cavablandırarkən hazırda ABŞ-da yaşayan tanınmış politoloq Ərəstun Oruclu dilə gətirib.

 

“Nəzəri baxımdan bəlkə də mümkündür. Amma praktiki olaraq bunu etməyin hal-hazırda əlverişli olduğunu demək olmaz. Ümumiyyətlə, Azərbaycan Yuxarı Qarabağın qalan ərazisindəki yurisdiksiyasını iki yolla bərpa edə bilər: hərbi və diplomatik-siyasi. Hərbi yol risklidir, çünki bu halda Rusiya 2008-ci ildə Gürcüstana qarşı tətbiq etdiyi Cənubi Osetiya senarisinə əl ata bilər. Yəni, “sülhməramlıları” qorumaq adı altında bölgəyə əlavə hərbi güc yeritmək ki, bu da heç bir halda Azərbaycanın maraqlarına cavab vermir. Diplomatik-siyasi yol isə daha geniş və özündə az risklər daşıyan kompleks vasitələrdən ibarətdir ki, burda da ilk növbədə ölkəmizin yeritməli olduğu çoxvektorlu siyasi doktrinanın qurulması önəmlidir. Həmin doktrina isə yalnız paralel olaraq ölkənin işğaldan azad edilmiş ərazilərində hərbi gücünün artırılması şəraitində effektiv işləyə bilər” –deyə politoloq bildirib.