Azərbaycan Respublikası Laçın rayonunun azı 5 il müddətinə Rusiya hərbi kontingentinin nəzarətinə verilmiş hava xətti ilə 5 km-lik enindəki əraziyə daxil olan Zabux kəndində qanunsuz məskunlaşmış ermənilər nəinki çıxarılıb, əksinə, 44 günlük savaşdan sonra həmin və digər rayonlardan, eləcə də Hadrut ərazisindən çıxmış ermənilərə də yer verilir.

 

Qarabaginfo.az xəbər verir ki, bu haqda Xankəndindəki separatçı nəşrlərə “Aqavno” adlandırılımış Zabux kəndinin 2011-ci ildən Livandan köçürülmüş qanunsuz “mer”i Andranik Çavuşyan məlumat çatdırıb.

 

Çavuşyanın sözlərinə görə, 2014-cü ildən Livanın “ARİ” şirkətinin tikdiyi 100-ə yaxın evdən 12-i Hadrut və Laçın, Qubadlı və Zəngilan rayonlarından köçmüş erməni ailələrinə verilib.

Qanunsuz “mer”  əvvəlcədən – yəni Laçın rayonunun işğalından bəri Zabuxda qanunsuz məskunlaşmış və son müharibə zamanı Ermənistana köçmüş ermənilərə xəbərdarlıq  edib ki, əgər tezliklə geri dönməsələr, evlərini qaçqın düşən digərlərinə verəcək. A.Çavuşyan yaxın müddətdə yeni evlərin də tikiləcəyini bildirib.

 

Əvvəl də yazdığımız kimi, hazırda Zabuxda tibb məntəqəsi və uşaq bağçası da tikilir. (Moderator.az)