Daxili İşlər Nazirliyinin (DİN) Şəxsi Heyətlə İş İdarəsinin rəisi, polis polkovniki Rahib Qarayev işdən azad edilib.

Qarabaginfo.az xəbər verir ki, "Report"un əldə etdiyi məlumata görə, bununla bağlı daxili işlər naziri, general-polkovnik Vilayət Eyvazov müvafiq əmr imzalayıb.

Əmrə əsasən, R.Qarayev xidmətdə olmanın son yaş həddi ilə əlaqədar təqaüdə göndərilib. Onun yerinə hələlik təyinat yoxdur.

Daxili İşlər Nazirliyinin (DİN) Mətbuat Xidməti “Report”a faktı təsdiqləyib.

Qeyd edək ki, R.Qarayev 1960-cı ilin iyul ayının 1-də Laçın rayonunun Kürdhacı kəndində anadan olub. Həmin rayonun Alxaslı kəndindəki orta məktəbi bitirdikdən sonra 1977-ci ildə Bakı şəhərində fəhlə kimi əmək fəaliyyətinə başlayıb.

1979-81-ci illərdə keçmiş SSRİ DİN-in Ukrayna və Moldovadakı Daxili Qoşun hissələrində həqiqi hərbi xidmətdə olub. Ordudan tərxis olunduqdan sonra müxtəlif tikinti təşkilatlarında çalışıb.

1984-cü ilin may ayının 1-də əmək kollektivinin zəmanəti ilə Azərbaycan Respublikasının daxili işlər orqanlarında xidmətə qəbul olunub. Təxminən 5 il sıravi əməkdaş kimi xidmət etdikdən sonra hüquq təhsili almaq üçün keçmiş SSRİ DİN-in Bakı Xüsusi Orta Milis Məktəbinə göndərilib. 1996-cı ildə Daxili İşlər Nazirliyinin Polis Akademiyasını bitirib.

Müxtəlif vəzifələrdə, o cümlədən tağım komandiri, baş inspektor, nazirliyin orqanı olan “Mübariz keşikdə” qəzetinin müxbiri, Mətbuat xidmətinin inspektoru, bölmə rəisi, İdarə rəisinin müavini vəzifələrində xidmət edib.

35 illik xidməti dövründə bir çox mükafatlara, o cümlədən fəxri fərmanlara, DİN-in “Əla xidmətlərinə görə” döş nişanına, “Daxili işlər orqanlarında qüsursuz xidmətə görə” medalının hər 3 dərəcəsinə, “Azərbaycan Polisinin 95 illiyi”, “Azərbaycan Polisinin 100 illiyi” yubiley medallarına layiq görülüb. 2007-ci ildə ölkə Prezidenti İlham Əliyevin müvafiq sərəncamı ilə “Vətən uğrunda” medalı ilə təltif olunub.

Ailəlidir, iki qız övladı, iki nəvəsi var.(Report)