Rusiya ordusu avqustda Ukrayna ərazisinin 477 kvadrat kilometrinə qədər irəliləyib. Bu da 2022-ci ilin oktyabrından bəri ən böyük aylıq artım olub.
Qarabaginfo.az “Frans-Press”ə istinadən bildirir ki, bu barədə Müharibə Tədqiqatları İnstitutunun (ISW) analitiklərinin təhlilində deyilir.
Son bir ayda Rusiya ordusu əsasən Donetsk vilayətinin şərq bölgələrində sutkada 15 kvadrat kilometr irəliləyib. Əsas qüvvələr Ukrayna qoşunlarının böyük təchizat mərkəzinin yerləşdiyi Pokrovsk şəhəri yaxınlığında cəmləşib. Ötən bazar günü rus qoşunları şəhərə yeddi kilometrdən də az bir məsafədə yaxınlaşıb.
Sonuncu dəfə Rusiya silahlı qüvvələri bir ay ərzində bu qədər ərazini 2022-ci ilin oktyabrında Ukraynanın Xarkov ətrafında böyük əks-hücumuna cavab olaraq ələ keçirmişdi. 2024-cü ilin əvvəlində Rusiya ordusu 1730 kvadrat kilometr ərazini işğal edərək Ukrayna ərazisinə yenidən hücuma keçib ki, bu da Ukrayna Silahlı Qüvvələrinin ələ keçirdiyi əraziləri geri ala bildiyi 2023-cü illə müqayisədə üç dəfə çoxdur.
Analitiklər qeyd edirlər ki, hazırda Ukrayna qoşunlarının öz ərazilərində əks-hücuma keçməsi çətindir. Sentyabrın 1-nə olan məlumata görə, Rusiya Ukrayna ərazisinin 66 266 kvadrat kilometrinə, ilhaq edilmiş Krımla birlikdə bütün Ukrayna ərazisinin 18%-nə nəzarət edir.
Ukrayna Silahlı Qüvvələri (AFU) avqustun əvvəlində öz mövqelərini 1,1 min kvadratkilometrdən çox artıraraq Kursk vilayətini işğal edib. Hazırda Ukrayna qoşunları Rusiya ərazisində 1150-1300 kvadrat kilometr əraziyə nəzarət edir.
Hərbi analitik Yan Matveyevin sözlərinə görə, Kursk vilayətinin tam müdafiəsi və itirilmiş ərazilərin geri qaytarılması üçün Rusiya Müdafiə Nazirliyinə 50 minə yaxın hərbçi lazımdır. Lakin Kremlin bütün qüvvələrini Donbasda hücuma cəmləyərək ordusunu Ukraynadan köçürmək planı yoxdur.
Kremlə yaxın mənbələr Bloomberg-ə daha əvvəl bildiriblər ki, Kursk vilayətinə çağırışçılar göndəriləcək. Meduza-nın Rusiya hakimiyyətinə yaxın həmsöhbətlərinin sözlərinə görə, Kursk yaxınlığında döyüşlər bir neçə ay davam edəcək. Bu, ən nikbin qiymətləndirmədir.
