Bakıda həbsdə saxlanılan livanlı erməni terrorçu Vigen Euljekjyanın həyat yoldaşı Linda Euljekyanan ötən ay əri ilə danışıb.

Qarabaginfo.az xəbər verir ki, o bu barədə “Hraparak”a açıqlamasında deyib.

“Keçən ay Vigenlə görüntülü danışdıq, o, daha yaxşı görünürdü. Mənə dedilər ki, Vigen eyni həbsxanadadır, lakin daha uyğun otağa köçürülüb”.

Linda ərinin vəziyyətinin ötən dəfəkindən yaxşı olduğunu, hətta bir qədər kökəldiyini qeyd edib.

Arvadı Vigen Euljekjyanın ondan paltar istədiyini bildirib.

“O, bir müddət öncə 31 erməni hərbçi ilə birgə Ermənistana qayıdacağını biləndə paltarlarını başqa məhbuslara paylamışdı. Təəssüf ki, azadlığa buraxılmadı. Məndən yeni paltarlar, sevimli yeməklərindən bəzilərini və şəkillərimizi istədi”, - qadın deyib.

Qızıl Xaç Cəmiyyətinin əməkdaşları Vigenin həyat yoldaşına hazırda onun səhhətində problem olmadığını bildiriblər.
 

Linda Euljekjyan ayın sonunda ərinin telefon zəngini gözləyir.

“Hraparak” yazıb ki, Livan hökuməti də Vigen Euljekjyana kömək etmək qərarına gəlib. Vigenin həyat yoldaşı ilə Livan parlamentinin erməni deputatı Paula Yakubean əlaqə saxlayıb və terrorçu haqqında məlumatı ölkənin baş nazirinə təqdim edib.

Qeyd edək ki, Livan ermənisi Vigen Euljekyan 2020-ci ildə imzalanmış 10 noyabr tarixli bəyanatdan sonra Şuşada saxlanılmışdı.

O, Azərbaycan ərazisinə qanunsuz daxil olmuş və ölkəmizin qanunvericiliyini pozan digər hərəkətlərə yol vermişdi. Vigen Euljekyan Azərbaycana qarşı müharibədə Ermənistan tərəfindən iştirak etmişdi.

Vigen Euljekyan 20 il müddətinə azadlıqdan məhrum edilib.