Almaniya hökuməti Aleksey Navalnı ilə bağlı yaşanan insidentə görə “Şimal axını-2” qaz kəmərinin tikintisinin dayandırıla biləcəyini açıqlayıb.

Qarabaginfo.az xəbər verir ki, bu barədə “ZDF” telekanalının efirində Almaniyanın Xarici İşlər naziri Hayko Maas məlumat verib.

“Bütün variantları gündəmə gətirəcəyik və lazımi anda qərar verəcəyik. Rusiya istintaqda iştirak edərək, belə bir qərarın verilməməsinə kömək edə bilər”,-deyə Maas vurğulayıb.

Qeyd edək ki, Almaniya hökuməti daha əvvəl də “Şimal axını - 2” layihəsinə qarşı sanksiyaların tətbiq olunmasının real olduğunu açıqlamışdı. Bu açıqlamalar Bundestaqın İqtisadiyyat və Enerji Komitəsinin rəhbəri Klaus Ernst tərəfindən tənqid olunub. Klaus Ernst bir çox Avropa şirkətinin layihə ilə maraqlandığını xatırladıb.

“Şimal axını-2” Rusiya sahillərindən Baltik dənizi ilə Almaniyaya ildə 55 milyard kubmetr tutumlu qaz kəməri çəkməyi nəzərdə tutur. ABŞ mayeləşdirilmiş təbii qazı Avropa Birliyinə satmaq üçün bu layihəyə fəal şəkildə qarşı çıxır.

Xatırladaq ki, 20 avqustda Tomsk-Moskva uçuşu əsnasında Navalnının vəziyyətinin pisləşməsilə təyyarə Omsk şəhərinə təcili eniş etmiş, siyasətçi təcili yardımla Omsk 1 nömrəli xəstəxanasına aparılmışdı. 22 avqustda isə o, yaxınlarının tələbi ilə xüsusi təyyarə vasitəsilə Berlinin “Şarite” klinikasına köçürülmüşdü.

7 sentyabrda klinika Navalnının süni komadan çıxarıldığını və vəziyyətinin yaxşılaşdığını açıqlamışdı.

Qafqazinfo.az