Bir çox insan yeni bank kartı aldıqdan sonra köhnə kartını sadəcə istifadə etmir və hesab edir ki, bu kifayətdir. Maliyyə mütəxəssisləri isə xəbərdarlıq edirlər ki, istifadəsiz qalan kartların rəsmi qaydada bağlanmaması sonradan gözlənilməz problemlərə səbəb ola bilər.

Qarabaginfo.az xəbər verir ki, bəzi banklarda kartdan istifadə edilməsə belə, hesaba xidmət haqqı və ya digər ödənişlər tətbiq oluna bilər. Nəticədə hesabda mənfi balans yarana və müştəri bunu uzun müddət hiss etməyə bilər.

İqtisadçı Elnur Quliyev bildirir ki, bank kartı artıq istifadə olunmursa, ilk növbədə həmin kartın bağlı olduğu hesabın statusu dəqiqləşdirilməlidir. Bəzi hallarda yalnız kart ləğv edilir, lakin bank hesabı aktiv qalır.

Ekspertin sözlərinə görə, vətəndaşlar mobil tətbiq və ya bank filialı vasitəsilə hesablarını yoxlamalı, bütün xidmət haqlarının bağlandığına əmin olmalıdırlar. Xüsusilə xaricdə açılmış bank hesabları üçün bu məsələ daha böyük əhəmiyyət daşıyır.

Mütəxəssislər tövsiyə edirlər ki, istifadə edilməyən kartlar evdə saxlanılmamalı, rəsmi qaydada bağlanmalı və şəxsi məlumatların təhlükəsizliyi üçün fiziki kart məhv edilməlidir. Bu, həm maliyyə itkilərinin, həm də mümkün dələduzluq hallarının qarşısını almağa kömək edir.