Azərbaycan Mərkəzi Bankı ötən il 724,3 mln. manat mənfəət əldə edib

Qarabaginfo.az qurumun maliyyə hesabatına istinadən xəbər verir ki, Mərkəzi Bank ötən il 724 milyon 321 min mənfəət əldə edib. Bu göstərici 2024-cü illə müqayisədə 0,4% çoxdur.

Hesabata görə, bu il yanvarın 1-ə Mərkəzi Bankın cəmi aktivləri 34 milyard 836,5 milyon manat təşkil edib. Bu göstərici 2024-cü illə müqayisədə 1 milyard 683,4 milyon manat və ya 4,6% azalıb. 2025-ci ilin yanvarın 1-ə bu rəqəm 36 milyard 519,9 milyon manat idi.

Hesabat dövründə AMB-nin pul vəsaitləri 2024-cü illə müqayisədə 4 milyard 631,3 milyon manat və ya 53,9% azalaraq 3 milyard 957,4 milyon manata düşüb. Eyni zamanda Beynəlxalq Valyuta Fondu ilə hesablaşmalar da 28,3 milyon manat və ya 2,5% azalaraq 1 milyard 101,1 milyon manat olub.

Ötən il Mərkəzi Bank banklara və bank olmayan kredit təşkilatlarına kredit qoyuluşu həyata keçirməyib. 2024-cü ildə bu kredit portfeli müvafiq olaraq 13,8 milyon manat və 648 min manat təşkil edirdi. Əmanətlərin Sığortalanması Fonduna verilmiş kreditlərin həcmi isə 35,1% azalaraq 163,9 milyon manatdan 106 milyon manata enib.

Digər tərəfdən, AMB-nin qeyri-maddi aktivlərində artım müşahidə olunub. Qeyri-maddi aktivlər 1,4% artaraq 39,5 milyon manat, investisiya mülkiyyəti isə cüzi azalaraq 36,1 milyon manat olub. Mərkəzi Bankın torpaq, tikili və avadanlıqlarının dəyəri isə 22,5% artıb.

Öhdəliklərə gəlincə, 2025-ci ildə Mərkəzi Bankın cəmi öhdəlikləri 32 milyard 675,6 milyon manat təşkil edib ki, bu da əvvəlki illə müqayisədə 1 milyard 847,3 milyon manat və ya 5,4% azdır.

Dövriyyədə olan kağız və metal pulların həcmi 12,3% artaraq 19 milyard 563,4 milyon manata yüksəlib. Rezident bankların qısamüddətli depozitləri isə təxminən iki dəfə artaraq 1 milyard 268,5 milyon manatdan 2 milyard 765,7 milyon manata çatıb.

Qurumun hökumət idarələri qarşısında öhdəlikləri isə kəskinazalıb. Bu göstərici bir il ərzində 4 milyard 564 milyon manat və ya 57,1% azalaraq 7 milyard 990,1 milyon manatdan 3 milyard 425,1 milyon manata düşüb. Kredit təşkilatları qarşısında öhdəliklər də 16,9% azalaraq 5 milyard 167,1 milyon manata bərabər olub. Bu il yanvarın 1-nə AMB-nin buraxdığı qiymətli kağızlarının ümumi dəyəri 365,749 milyon manat olub. Bu isə illik müqayisədə 159 milyon 837 min manat və ya 77,6% çoxdur. Beynəlxalq Valyuta Fondu ilə əməliyyatlar üzrə öhdəliklər 5,5% artaraq 1 milyard 240.2 mln manata, beynəlxalq maliyyə institutları qarşısında öhdəliklər 1.2 mln manatdan 1.6 mln manata çatıb.

2025-ci ilin sonuna AMB-nin cəmi kapitalı 2 milyard 160,9 milyon manat təşkil edib ki, bu da illik müqayisədə 163,8 milyon manat və ya 8,2% çoxdur.

Hesabat dövründə AMB-nin effektiv faiz dərəcəsi metodu ilə hesablanmış faiz gəlirləri illik müqayisədə 190,1 milyon manat və ya 34,8% azalaraq 546,1 milyon manatdan 356 milyon manata düşüb. Ötən il xalis faiz gəlirləri 493,3 milyon manat olub. 2024-cü ildə bu göstərici 498,8 milyon manat idi ki, bu da illik müqayisədə 1,1% azalma deməkdir. Haqq və komissiya gəlirləri cüzi artaraq 27,8 milyon manat təşkil edib. Qurumun xarici valyuta əməliyyatları üzrə xalis gəliri isə illik müqayisədə 303 min manat və ya 24,9% artararq 1,218 min manata çatıb.