Qazaxıstan may ayında “Drujba” sistemi ilə nəqlin dayandırılması ilə əlaqədar olaraq 260 min ton nefti alternativ marşrutlara - Ust-Luqa limanı istiqamətinə və Xəzər Boru Kəməri Konsorsiumunun (CPC) sisteminə yönləndirəcək.

“İnterfax” xəbər verir ki, bu barədə Qazaxıstanın energetika nazirinin müşaviri, nazirliyin rəsmi nümayəndəsi Asel Serikpayeva məlumat verib.

“2026-cı ilin may ayı üzrə Almaniya istiqamətində (Şvedt NEZ-ə - red.) “Drujba” sistemi vasitəsilə tranzit qrafikinə düzəliş edilməsi ilə əlaqədar olaraq, Energetika Nazirliyi 260 min ton həcmində neft ixracı həcmlərinin planlı şəkildə paylaşdırılması barədə məlumat verir”, - Asel Serikpayeva qeyd edib.

Onun sözlərinə görə, bu həcmlər alternativ və texniki cəhətdən işlənmiş marşrutlar üzrə göndəriləcək: 100 min ton Ust-Luqa limanına, 160 min ton isə CPC sisteminə.

Nazir müşaviri əlavə edib ki, axınların istiqamətinin dəyişdirilməsi yük göndərənlərlə razılaşdırılıb və əməliyyat xarakteri daşıyır.

“Nəqliyyat marşrutlarının dəyişdirilməsinin illik neft hasilatı planının icrasına təsir etmədiyini vurğulayırıq. Mövcud nəqliyyat infrastrukturu Qazaxıstana ixracın sabitliyini və xammalın dünya bazarlarına fasiləsiz tədarükünü tam həcmdə təmin etməyə imkan verir”, - Asel Serikpayeva vurğulayıb.

Bundan əvvəl Qazaxıstanın energetika naziri Yerlan Akkenjenov bildirmişdi ki, o, qeyri-rəsmi kanallar vasitəsilə Rusiyanın may ayında Qazaxıstan neftinin “Drujba” sistemi ilə Almaniya istiqamətində tranzitini dayandıracağı barədə məlumat alıb.

Nazir bildirmişdi ki, 2026-cı ilin yekunlarına əsasən Qazaxıstan Almaniyaya “Drujba” boru kəməri vasitəsilə təxminən 3 milyon ton neft göndərməyi planlaşdırırdı.

Qeyd etmək lazımdır ki, Qazaxıstan həmçinin Bakı-Tbilisi-Ceyhan boru kəməri vasitəsilə neftini dünya bazarlarına nəql edir.