Taekvondo üzrə dünya çempionu Emin Çətinbağ cinayətkar qruplaşmanın tərkibində dələduzluqda şübhəli bilinərək saxlanılıb.

Qarabaginfo.az xəbər verir ki, bu barədə TASS-a Rusiya Federasiyası İstintaq Komitəsinin mətbuat xidmətindən məlumat verilib.

Qeyd olunub ki, saxlanılanlar arasında bir neçə keçmiş polis də var.

“Rusiya İstintaq Komitəsinin Moskva şəhəri üzrə istintaq orqanları polis idarələrindən birinin keçmiş əməliyyatçıları və taekvondo üzrə dünya çempionu Emin Çətinbağ da daxil olmaqla, cinayətkar qrupun 6 üzvünə qarşı cinayət işini araşdırır.

Onlar Rusiya Federasiyası Cinayət Məcəlləsinin 286-cı maddəsinin 3-cü hissəsinin "a", "g", "e" bəndlərində (vəzifə səlahiyyətlərindən sui-istifadə), Rusiya Federasiyası Cinayət Məcəlləsinin 159-cu maddəsinin 4-cü hissəsində (dələduzluq) nəzərdə tutulmuş cinayətləri törətməkdə ittiham olunurlar.

İstintaq cinayətkar qrupun 5 üzvünə qarşı ittiham irəli sürüb və barəsində həbs-qətimkan tədbiri seçilib”, - deyə İstintaq Komitəsinin mətbuat xidmətindən bildirilib.

O da bildirilib ki, məlum cinayət işi ilə bağlı daha bir şəxs barəsində axtarış elan edilib.

Beynəlxalq dərəcəli idman ustası Emin Çətinbağ Rusiya milli komandasının tərkibində 2023-cü ildə taekvondo üzrə dünya çempionu olub.