Gürcüstan Cənubi Qafqazda sülh, əməkdaşlıq və sabitliyin təşviqi üçün səylərini davam etdirəcək.

Qarabaginfo.az xəbər verir ki, bu barədə baş nazirliyə namizəd İrakli Kobaxidzenin proqramında deyilir.

Onun “Avropa dövlətinin qurulması üçün” proqramı Gürcüstan parlamentinə təqdim olunub.

Gürcüstanın qanunverici orqanı fevralın 8-də baş nazirliyə namizədə, onun hökumət tərkibinə və hökumət proqramına etimad ifadə etmək üçün toplanacaq.

Sənəddə qeyd olunur ki, Gürcüstan “regionda balanslaşdırılmış və qarşılıqlı faydalı tərəfdaşlıq əməkdaşlığına əsaslanan siyasətini davam etdirir və bununla da regionun davamlı və sabit inkişafı prosesinə mühüm töhfə verir”.

"Bu baxımdan, ilk növbədə, Cənubi Qafqazda sülhün, əməkdaşlığın və sabitliyin bərqərar olması istiqamətində səylər davam etdiriləcək. Bu məqsədlər üçün qonşu tərəfdaş dövlətlərlə uğurlu əməkdaşlığın gücləndirilməsi, bütün sahələrdə ikitərəfli münasibətlərin inkişaf etdirilməsi, ikitərəfli münasibətlərin daha da inkişaf etdirilməsi, Cənubi Qafqazda sülhün, əməkdaşlığın və sabitliyin təmin edilməsi, o cümlədən milli maraqlara uyğun olaraq, strateji tərəfdaşlıq və mehriban qonşuluq əsasında sərhədlərin delimitasiyası və demarkasiyası istiqamətində səylər davam etdiriləcək”, - deyə proqramda qeyd olunub.

Sənəddə Türkiyə, eləcə də Azərbaycan və Ermənistanla ikitərəfli strateji əlaqələrin mövcud yüksək dinamikasının qorunub saxlanılmasının və gücləndirilməsinin vacibliyi vurğulanır.