Türkiyədə hazırkı prezident Rəcəb Tayyib Ərdoğanın yenidən ölkə başçısı seçilməsindən sonra qurulacaq yeni hökumətin tərkibi geniş müzakirə olunan məsələlərdəndir.

Qarabaginfo.az Türkiyə mətbuatına istinadən xəbər verir ki, bu mövzuda bir sıra kulis məlumatları yayılıb.

Hazırkı kabinədəki 17 nəfərdən 15-i parlament seçkilərində namizəd olaraq deputat seçilib. Qanunvericiliyə əsasən, prezidentli respublika olan Türkiyədə həm icraedici, həm də qanunverici hakimiyyətdə eyni vaxtda təmsil olunmaq qadağandır.

Bu baxımdan yeni hökumətdə əksər nazirliklərə yeni simaların təyin olunması gözlənilir. Bununla belə, parlamentə seçilmiş bəzi eks-nazirlərin də yenidən təyinat alaraq deputatlıqdan istefa verməsi ssenarisi gündəmdədir.

Bir sıra mənbələrə görə, yeni hökumətdə kadr dəyişiklikləri ilə yanaşı, struktur dəyişiklikləri də gözlənilir. Belə ki, Mədəniyyət və Turizm Nazirliyi, eləcə də Xəzinə və Maliyyə Nazirliyi iki hissəyə bölünə bilər.

Ərdoğanın andiçmə mərasiminin 2 iyun və ya 6 iyun tarixində baş tutacağı barədə məlumatlar yayılıb. Rəsmi olaraq hökumət tərkibinin elan olunması bundan sonra həyata keçiriləcək.

Hansı vəzifələrə kimlərin təyin oluna biləcəyi barədə məlumatı aşağıdakı cədvəldən almaq mümkündür:

Məlumata görə, "Cümhur İttifaqı"na daxil olan siyasi qüvvələrdən Milliyyətçi Hərəkat Partiyasına vitse-prezidentlik, Böyük Birlik Partiyası, Yenidən Rifah Partiyası və HÜDAPAR-a nazir müavini postları verilə bilər.

Qeyd edək ki, 14 mayda keçirilmiş prezident seçkilərinin ilk turunda heç bir namizədin 50%+1 səs toplaya bilməməsindən sonra 28 mayda Türkiyədə keçirilən ikinci tur prezident seçkilərində "Cümhur İttifaqı"nın namizədi Rəcəb Tayyib Ərdoğan 52,18 faiz, "Millət İttifaqı"nın namizədi Kemal Kılıçdaroğlu isə 47,82 faiz səs qazanıb.(Modern.az)