Birləşmiş Ştatlar münaqişənin uzadılması və daha şiddətli olması üçün hər şey edir.

Bunu TASS-a müsahibəsində Rusiyanın xarici işlər naziri Sergey Lavrov deyib.

"Pentaqon açıq şəkildə Amerika müdafiə sənayesinin gələcək illər üçün sifarişlərini planlaşdırır, Ukrayna Silahlı Qüvvələrinin ehtiyatları ilə bağlı hərbi xərclər üçün səviyyəni daim qaldırır və anti-Rusiya alyansının digər üzvlərindən də bunu tələb edir. Kiyev rejimi qəsdən ən müasir silahlarla, o cümlədən Qərb ordularına hələ qəbul edilməmiş silah nümunələri ilə doldurulur. Görünür, bu, onların döyüş şəraitində necə işlədiyini görmək üçün edilir. Bu ilin fevralından bəri Kiyev rejiminə hərbi yardımın həcmi 40 milyard dolları keçib ki, bu da bir çox Avropa ölkələrinin hərbi büdcələri ilə müqayisə oluna bilər", - deyə Lavrov bildirib.

Rusiya XİN başçısının sözlərinə görə, artıq NATO-ya üzvü olan ölkələr faktiki olaraq münaqişə tərəfinə çevrilib: "Qərbin özəl hərbi şirkətləri və hərbi təlimatçılar Ukrayna Silahlı Qüvvələrinin tərəfində vuruşurlar. Amerikalılar peyk və digər kəşfiyyat məlumatlarını demək olar ki, real vaxt rejimində Ukrayna komandanlığına ötürür, hərbi əməliyyatların planlaşdırılmasında və həyata keçirilməsində iştirak edirlər.

Öz növbəsində, Kiyev rejimi Rusiya Ordusu ilə baş-başa toqquşmanı qaçılmaz etmək ümidi ilə amerikalıları və digər NATO üzvlərini münaqişə burulğanına daha da sürükləməyə çalışır. Noyabrın 15-də Ukraynanın hava hücumundan müdafiə raketinin Polşa ərazisinə düşməsi ilə baş vermiş təxribatı xatırlamaq kifayətdir, Zelenski onu yalandan Rusiyanın raketi kimi təqdim etməyə çalışdı. Yaxşı ki, Vaşinqton və Brüsselin bu tələyə düşməyəcək qədər ağılı oldu. Amma bu insident rejimin dayanacağı heç nə olmadığını göstərdi".

Lavrov qeyd edib ki, ölkəsi Qərbdəki düşmənlərini onların Ukrayna böhranını gücləndirmək kursunun təhlükəsi barədə xəbərdar etməkdən əl çəkmir.

"Onların Kiyevdə yetişdirdiyi kontingentlə vəziyyətin nəzarətsiz inkişafı riski çox yüksək olaraq qalır. Fəlakətin qarşısını almaq vacibdir.

Münaqişənin müddətinə gəlincə, top Kiyev rejiminin tərəfində, Vaşinqton isə onun arxasındadır. Mənasız müqaviməti hər an dayandıra bilərlər.

Rejimin nəzarətində olan ərazilərin demilitarizasiyası və denasifikasiyası, oradan Rusiyanın, o cümlədən yeni torpaqlarımız - DXR, LXR, Xerson və Zaporojye vilayətlərinin təhlükəsizliyinə təhdidlərin aradan qaldırılması ilə bağlı təkliflərimiz düşmənə yaxşı məlumdur. Məsələ kiçikdir: onları ən yaxşı şəkildə yerinə yetirmək, əks halda məsələni Rusiya Ordusu həll edəcək", - deyə Rusiya XİN başçısı vurğulayıb.