ABŞ İranla müharibəni tez bir zamanda bitirə və ya iqtisadi təzyiqi davam etdirərək ölkənin daha da zəifləməsinə imkan verə bilər.

Qarabaginfo.az xəbər verir ki, bunu ABŞ Prezidenti Donald Tramp Floridaya yola düşməzdən əvvəl jurnalistlərə açıqlamasında bildirib.

O, Tehranı inflyasiya və pul çatışmazlığı ilə mübarizə aparan uğursuz ölkə kimi xarakterizə edib.

Tramp ABŞ-ın dəniz blokadasının İranın neft ixracına mane olduğunu, eyni zamanda digər ölkələrin gəmilərinin Hörmüz boğazından keçməsinə icazə verildiyini bildirib.

“Sual budur ki, Vaşinqton müharibəyə tez son qoymağa çalışmalıdır, yoxsa münaqişənin tədricən səngiməsinə imkan verməlidir? Biz müharibəni çox tez bitirə bilərik, amma İran çökmək ərəfəsində olan bir ölkədir. Onların pulu yoxdur. Sual ondadır ki, biz işi tamamlamaq istəyirik, yoxsa vəziyyətin belə davam etməsinə və onların tədricən əldən düşməsinə imkan verməliyik?”, –Tramp bildirib.

ABŞ Prezidenti Vaşinqtonun blokada vasitəsilə artıq məqsədlərinə çatdığını deyib. O, həmçinin müharibədən əvvəlki dövrlə müqayisədə hazırda boğazdan daha çox neftin daşındığını bildirib.