Azərbaycan Respublikasının Vəkillər Kollegiyasının üzvü peşəkar vəkil Adəm Məmmədov hüquqlarını müdafiə etdiyi sabiq baş prokuror və səfir Eldar Həsənovla görüşüb.

Qarabaginfo.az xəbər verir ki, bu barədə Vəkil Adəm Məmmədov "Təzadlar"a bildirib. O, qeyd edib ki, bu gün-yanvarın 5-də Azərbaycan Respublikasının Dövlət Təhlükəsizlik Xidmətinin İstintaq Təcridxanasında saxlanılan sabiq baş prokuror və səfir Eldar Həsənov ilə görüşüb. Vəkil qeyd edib ki,yaxın günlərdə mətbuat üçün ciddi açıqlamaları olacaq!
Qeyd edək ki, DTX-nin yaydığı məlumata görə, Azərbaycan Respublikası Xarici İşlər Nazirliyinin bəzi vəzifəli şəxslərinin öz səlahiyyətlərindən sui-istifadə edib dövlətin qanunla qorunan mənafelərinə mühüm zərər vuran əməllərə yol vermələri ilə bağlı başlanılmış cinayət işi üzrə Xarici İşlər Nazirliyinin İşlər idarəsinin müdiri, Nazirliyin Tender Komissiyasının sədri Fərhad Mollazadə, Konsulluq idarəsinin rəisi Faiq Bağırov və digərləri vəzifə səlahiyyətlərindən sui-istifadə etmə, mənimsəmə, rüşvət alma faktlarına görə cinayət məsuliyyətinə cəlb edilərək barələrində məhkəmənin qərarları əsasında həbs qətimkan tədbiri seçilib. Davam edən cinayət işi üzrə həyata keçirilən istintaq-əməliyyat tədbirləri zamanı Xarici İşlər Nazirliyinin fəaliyyət istiqamətləri üzrə ayrılan dövlət büdcə vəsaitlərinin mənimsənilməsi ilə bağlı yeni məlumatlar əldə edilib, toplanılmış materiallar əsasında müvafiq qərarla kompleks maliyyə-təsərrüfat fəaliyyəti üzrə yoxlama təyin edilib. Maliyyə yoxlamaları zamanı Azərbaycan Respublikasının Serbiya Respublikasında, Monteneqroda, Bosniya və Herseqovinadakı səfiri Həsənov Eldar Hümbət oğlu tərəfindən xeyli miqdarda büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edilib. Aparılan istintaq çərçivəsində Eldar Həsənov şübhəli şəxs qismində tutulub. Lakin Eldar Həsənov bu günədək ittihamları qəbul etmir.