ABŞ Sakit Okeandakı Quam bazasına nüvə silahına malik sualtı qayıq yerləşdirib ki, bunu regionda Çin və Şimali Koreyaya siqnal adlandırıblar. ABŞ Hərbi Dəniz Qüvvələri bu addımın Vaşinqtonun Hind-Sakit okean regionunun təhlükəsizliyinə sadiqliyini əks etdirdiyini bildirib.

Qarabaginfo.az bildirir ki, bu barədə Britaniyanın nüfuzlu “The Times” nəşri yazır. Qəzet bildirir ki, ABŞ Sakit okeanın qərbində nüvə silahlı sualtı qayıq yerləşdirməklə Çin və Şimali Koreyaya “xəbərdarlıq siqnalı” göndərib və Pxenyanı qanunsuz və sabitliyi pozan ballistik raket sınaqlarını dayandırmağa çağırıb.

“Trident II” ballistik raketləri ilə silahlanmış “USS Nevada” nüvə sualtı qayığı həftə sonu ABŞ-ın Quam adasındakı hərbi-dəniz bazasına gəlib və gərginliyin artması fonunda regionda təhlükəsizliyə “hazırlıq və sadiqlik” nümayiş etdirib. Bu, 2016-cı ildə “USS Pennsylvania” limana gəldikdən sonra ABŞ ballistik raket sualtı qayığının Quama ilk səfəri və 1980-ci illərdən bəri ABŞ Hərbi Dəniz Qüvvələrinin elan etdiyi ikinci səfərdir.

"Quam limanına girməklə çağırış edən ABŞ Hind-Sakit Okean regionuna sadiqliyini nümayiş etdirir və bununla strateji qüvvələr tərəfindən həyata keçirilən çoxsaylı təlimləri, əməliyyatları, məşqləri və hərbi əməkdaşlıq fəaliyyətlərini tamamlayır və onların istənilən vaxt bütün dünya üzrə hərəkətə hazır olmasını təmin edir", - deyə ABŞ Hərbi Dəniz Qüvvələrinin bəyanatında deyilir.

2022-ci ilin əvvəlindən Şimali Koreya bir sıra ballistik raket sınaqları keçirdi və bu sınaq bazar ertəsi Yaponiya dənizinə düşən iki raketin sınaq buraxılışı ilə davam etdi. Cənubi Koreyanın Birləşmiş Qərargah Rəisləri Komitəsinin məlumatına görə, raketlər 40 km-dən çox yüksəklikdə 380 km uçub. Nəşrin xatırlatdığı kimi, KXDR tərəfindən ballistik və nüvə silahlarının sınağı Birləşmiş Millətlər Təşkilatının sanksiyaları ilə qadağandır, lakin Kim Çen In hakimiyyətə gəldikdən sonra ölkə bu qadağanı mütəmadi olaraq pozur.

Cənubi Koreya və Yaponiya rəsmiləri ilə telefon danışığında ABŞ-ın Şimali Koreya üzrə xüsusi nümayəndəsi Son Kim raket buraxılışlarından “narahatlıq ifadə edib”. Dövlət Departamentinin sözçüsü Ned Praysın bəyanatına görə, siyasətçi Pxenyanı “ilkin şərt olmadan” dialoqa qayıtmağa çağırıb. Son Kim həmçinin ABŞ-ın Koreya yarımadasının tam nüvə tərksilahına sadiqliyini, eləcə də müttəfiqləri olan Cənubi Koreya və Yaponiyanı qorumaq öhdəliyini bir daha təsdiqləyib.

Yaponiyanın baş naziri Fumio Kisida KXDR-in hərəkətlərini tamamilə qəbuledilməz adlandırıb, lakin Kim Çen Inla Pxenyanın nüvə proqramı, həmçinin keçmişdə Yaponiya vətəndaşlarının oğurlanması məsələsi ilə bağlı dialoqun mümkünlüyünü istisna etməyib.

Bir sıra ekspertlər iddia edirlər ki, bu cür tez-tez raket buraxılışı Şimali Koreyanın qonşularına və ABŞ-a təzyiq göstərmək cəhdidir ki, onları danışıqlar masası arxasına oturmağa və güzəştlərə getməyə, məsələn, sanksiyaların ləğvinə razılıq verməyə məcbur etsinlər.

“The Times” yazır ki, Pxenyan hələlik Vaşinqtonun danışıqlarla bağlı təkliflərinə cavab verməyib. Bununla belə, nəşr hesab edir ki, “USS Nevada” sualtı qayığının yerləşdirilməsi və Amerikanın nüvə gücünün nümayişi nə Pxenyan, nə də Pekinə təsirsiz ötüşməyib.

Xatırladaq ki, bundan əvvəl Çin Tayvan yaxınlığında təxribat xarakterli təlimlər keçirərək, Qərbə adaya gəmi və diplomatik nümayəndəliklər göndərməmək barədə xəbərdarlıq etmişdi. ABŞ-ın hərbi gəmilərinin tez-tez bölgədə görünməsi Çinin Cənubi Çin dənizindəki iddialarına etiraz məqsədi daşıyır.(Moderator.az)